1952 اور 2015 کے بعد تیسری بار بہار اسمبلی انتخابات میں صفر پر آؤٹ ہوئی سی پی آئی

پٹنہ، 16 نومبر (یواین آئی) اس سال بہار اسمبلی انتخاب میں قومی جمہوری اتحاد (این ڈی اے) کی زبردست لہر میں مہاگٹھ بندھن کی حلیف کمیونسٹ پارٹی آف انڈیا (سی پی آئی) کا صفایا ہو گیا ہے۔بہار میں 1952 سے لے کر 2025 تک ہونے والے اسمبلی انتخابات میں تیسری بار ایسا ہوا ہے کہ سی پی آئی کا کھاتہ نہیں کھلا ہے۔ سال 1952 اور 2015 کے اسمبلی انتخابات میں بھی سی پی آئی کا کھاتہ نہیں کھلا تھا۔ یہ تیسرا موقع ہے جب سی پی آئی کو اتنی کراری ہار کا سامنا کرنا پڑا ہے۔اس بار کے انتخاب میں سی پی آئی نے نو نشستوں ۔ بہار شریف، کرگہر، راجا پاکڑ (محفوظ)، بچھواڑہ، تیگھڑا، بکھری (محفوظ)، بانکا، ہرلاکھی اور جھنجھارپور پر اپنے امیدوار اتارے تھے، لیکن سبھی کو شکست کا سامنا کرنا پڑا۔ سال 2020 کے انتخاب میں دو نشستوں تیگھڑا اور بکھری (محفوظ) پرسی پی آئی کے امیدواروں نے جیت حاصل کی تھی، لیکن اس انتخاب میں یہ دونوں انتخابی حلقے پی آئی کے ہاتھوں سے نکل گئے۔ تیگھڑاکے سبکدوش ایم ایل اے رام رتن سنگھ کو بھارتیہ جنتا پارٹی (بی جے پی) کے امیدوار رجنیش کمار سنگھ نے 35634 ووٹوں کے فرق سے ہرا دیا، وہیں بکھری (محفوظ) نشست کے سبکدوش ایم ایل اے سوریہ کانت پاسوان کو لوک جن شکتی پارٹی (رام ولاس) کے امیدوار سنجے کمار نے 17318 ووٹوں کے فرق سے شکست دی۔اس بار کے انتخاب میں ان نو نشستوں میں سے چار سیٹوں۔ بہار شریف، کرگہر، راجا پاکڑ (محفوظ) اور بچھواڑہ پر سی پی آئی اور مہاگٹھ بندھن کی ہی حلیف کانگریس کے امیدوار بھی ایک دوسرے کو چیلنج دیتے نظر آئے۔ ان تمام چار سیٹوں پر ہونے والی دوستانہ لڑائی میں نہ سی پی آئی کو اور نہ ہی کانگریس کو جیت ملی۔ این ڈی اے کے امیدواروں نے بازی مار لی۔ ان میں دو سیٹیں راجا پاکڑ (محفوظ) اور کرگہر وہ تھیں جن پر کانگریس نے سال 2020 میں قبضہ جمایا تھا، لیکن یہ سیٹیں بھی اس کے ہاتھ سے نکل گئیں۔ راجا پاکڑ کی سبکدوش ایم ایل اے پرتیما کماری اور کرگہر کے سبکدوش ایم ایل اے سنتوش کمار مشرا کو ہار کا سامنا کرنا پڑا۔ ایسا مانا جا رہا ہے کہ اگر ان دونوں سیٹوں پر کانگریس یا پھر سی پی آئی اکیلے انتخاب لڑتی تو نتیجہ مہاگٹھ بندھن کے امیدواروں کے حق میں جا سکتا تھا۔ بقیہ پانچ سیٹوں بہار شریف، بچھواڑہ، بانکا، ہرلاکھی اور جھنجھارپور میں سال 2020 کے انتخاب میں این ڈی اے کے امیدواروں نے جیت حاصل کی تھی۔ اس بار بھی ان تمام پانچ سیٹوں پر این ڈی اے کے امیدواروں نے پرچم لہرا دیا۔ ان میں تین سیٹوں پر بہار حکومت کے وزراءانتخاب جیتے۔ ان میں بہار شریف سے بی جے پی کے امیدوار اور ماحولیات و جنگلات کے وزیر ڈاکٹر سنیل کمار،بچھواڑہ سے بی جے پی کے امیدوار اور وزیر کھیل و امور نوجوان سریندر مہتا، اور جھنجھارپور سے سابق وزیر اعلیٰ آنجہانی جگن ناتھ مشرا کے فرزند، بھارتیہ جنتا پارٹی (بی جے پی ) کے امیدوار اور وزیر صنعت نتیش مشرا نے کامیابی حاصل کی۔ سابق وزیر اعلیٰ جگن ناتھ مشرا نے مسلسل پانچ بار 1972 سے 1990 تک اس نشست پر جیت درج کی تھی۔