وزیر اعلی کا ایندھن کی بچت اور ماحولیاتی تحفظ کا بڑا پیغام

وزیراعلیٰ سمراٹ چودھری اپنے دفتر پیدل پہنچے

جدید بھارت نیوز سروس
پٹنہ، 15 مئی: بہار کی سیاست میں ان دنوں ایک مثبت تبدیلی کی لہر نظر آ رہی ہے، جہاں اقتدار کے ایوانوں سے لے کر عام ملازمین تک ایندھن کی بچت اور ماحولیات کے تحفظ کے لیے سنجیدہ نظر آ رہے ہیں۔ اس مہم کی قیادت خود وزیر اعلیٰ سمراٹ چودھری کر رہے ہیں، جنہوں نے آج وزیر اعظم نریندر مودی کی اپیل پر عمل کرتے ہوئے ایک نئی مثال قائم کی۔ وزیر اعلیٰ اپنی سرکاری رہائش گاہ سے وزیر اعلیٰ سیکریٹریٹ تک کا فاصلہ پیدل طے کر کے اپنے دفتر پہنچے۔ جمعہ کے روز کو ‘نو وہیکل ڈے ‘ کے طور پر مناتے ہوئے وزیر اعلیٰ کا یہ اقدام علامتی ہونے کے ساتھ ساتھ انتظامیہ اور عوام کے لیے ایک واضح پیغام بھی ہے۔وزیر اعلیٰ کے اس اقدام کا اثر فوری طور پر انتظامیہ پر بھی دیکھا گیا۔ آج پٹنہ میں سیکریٹریٹ کے افسران اور ملازمین کی بڑی تعداد نے اپنی نجی اور سرکاری گاڑیوں کا استعمال کرنے سے گریز کیا۔ سیکریٹریٹ کمپلیکس کے اطراف جہاں عموماً سرکاری گاڑیوں کا ہجوم رہتا تھا، آج وہاں گاڑیوں کی تعداد معمول سے کافی کم رہی۔ اکثر ملازمین اور اعلیٰ حکام سائیکلوں، پبلک ٹرانسپورٹ یا پیدل ہی دفتر پہنچتے ہوئے نظر آئے۔ یہ منظر اس بات کی عکاسی کر رہا تھا کہ حکومتی سطح پر ایندھن کی بچت کے حوالے سے کی جانے والی اپیل کو افسران نے سنجیدگی سے لیا ہے۔سمراٹ چودھری نے نہ صرف پیدل چل کر بلکہ اپنے سفری پروٹوکول میں بھی بڑی تبدیلی لاکر سادگی کا ثبوت دیا ہے۔
گزشتہ جمعرات کو جب وہ دربھنگہ ایئرپورٹ کے ایک پروگرام میں شرکت کے لیے روانہ ہوئے، تو ان کے قافلے میں صرف تین گاڑیاں شامل تھیں، جبکہ اس سے قبل وزیر اعلیٰ کے قافلے میں عام طور پر 19 گاڑیاں ہوا کرتی تھیں۔ دربھنگہ میں خطاب کرتے ہوئے انہوں نے عوام اور عوامی نمائندوں سے اپیل کی کہ وہ نجی گاڑیوں کا استعمال کم کریں اور ہفتے میں کم از کم ایک دن کو ‘نو وہیکل ڈے ‘ کے طور پر منائیں۔ انہوں نے اس بات پر بھی زور دیا کہ جہاں ممکن ہو، سرکاری اور نجی دفاتر میں گھر سے کام (Work from Home) کو فروغ دیا جائے تاکہ سڑکوں پر ٹریفک اور ایندھن کی کھپت کو کم کیا جا سکے۔ایندھن بچانے کے اس پیغام پر عمل درآمد صرف وزیر اعلیٰ تک محدود نہیں رہا بلکہ کابینہ کے دیگر ارکان بھی اس میں پیش پیش ہیں۔ بہار کے وزیر برائے کان کنی، ارضیات اور ثقافت، ڈاکٹر پرمود کمار نے بھی اس مہم کا حصہ بنتے ہوئے ٹرین کے ذریعے گیا کا سفر کیا، جس کا مقصد عوام کو پبلک ٹرانسپورٹ کی اہمیت بتانا تھا۔ دوسری جانب، مرکزی وزیر نتیانند رائے کے دفتر نے بھی بہار حکومت کو ایک خط لکھ کر مطلع کیا ہے کہ ان کے دورہ بہار کے دوران سیکورٹی پروٹوکول کو مختصر رکھا جائے، جس میں صرف ایک سی آر پی ایف اور ایک بہار پولیس کی گاڑی شامل ہوگی۔ مجموعی طور پر بہار میں شروع ہونے والی یہ ‘سبز مہم ‘ نہ صرف عالمی ایندھن کے بحران سے نمٹنے میں معاون ثابت ہوگی بلکہ بڑھتی ہوئی ماحولیاتی آلودگی کو کم کرنے میں بھی ایک سنگِ میل ثابت ہو سکتی ہے۔