7views
امرتسر، 5 فروری:۔ (ایجنسی) امریکہ سے ملک بدر کیے گئے تقریباً 104 ہندوستانیوں کو لے کر ایک امریکی فوجی طیارہ بدھ (5 فروری) کو سری گرو رام داس جی بین الاقوامی ہوائی اڈے پر اترا۔ امریکی فوجی طیارہ C-17 پنجاب اور پڑوسی ریاستوں سے 104 غیر قانونی تارکین وطن کو لے کر پہنچ گیا۔ امریکہ میں رہنے والے ہندوستانیوں کی یہ پہلی ملک بدری ہے۔ امریکہ سے ہندوستان بھیجے جانے والے ہندوستانیوں کی تعداد 104 ہے۔ ان لوگوں میں اکثریت پنجاب، ہریانہ اور گجرات سے ہے۔ پنجاب کے کل 30 افراد اس فہرست میں شامل ہیں۔ پنجاب کے مختلف اضلاع کی پولیس ایئرپورٹ پہنچ گئی۔ اس کے علاوہ امریکہ سے ڈی پورٹ ہونے والوں میں اتر پردیش کے لوگ بھی شامل ہیں۔ معلومات کے مطابق طیارے میں پنجاب کے 30، ہریانہ کے 33، گجرات کے 33، مہاراشٹر کے 3، یوپی کے 3 اور چندی گڑھ کے 2 شہری سوار ہیں۔ڈی جی پی پنجاب نے بیان جاری کیا
پنجاب کے ڈائریکٹر جنرل آف پولیس (ڈی جی پی) گورو یادو نے کہا کہ ریاستی حکومت تارکین وطن کا استقبال کرے گی اور ہوائی اڈے پر کاؤنٹر قائم کرے گی۔ پنجاب کے این آر آئی امور کے وزیر کلدیپ سنگھ دھالیوال نے منگل کو امریکی حکومت کے فیصلے پر مایوسی کا اظہار کیا اور کہا کہ ان لوگوں کو، جنہوں نے اس ملک کی معیشت میں حصہ ڈالا، انہیں ملک بدر کیے جانے کے بجائے مستقل رہائش دی جانی چاہیے تھی۔
