جدید بھارت نیوز سروس
رانچی، 18 اکتوبر:۔ ان دنوں جھارکھنڈ میں انتخابی جوش وخروش کے درمیان، نہ صرف جھارکھنڈ بلکہ ملک اور بیرون ملک سے بھی فنکار ووٹروں کو ووٹنگ کے بارے میں آگاہ کرنے کے لیے پہنچے ہیں۔ آرٹ 81 مہوتسو کے ذریعے ووٹروں کو آگاہ کرنے کے لیے آئے ان فنکاروں کا اجتماع جے پال سنگھ منڈا اسٹیڈیم میں ہوا۔ جہاں دو روزہ آرٹ فیسٹیول کے ذریعے کئی پینٹنگز بنائی جا رہی ہیں۔الیکشن کمیشن کے زیر اہتمام اس دو روزہ آرٹ 81 مہوتسو کا افتتاح چیف الیکٹورل آفیسر کے روی کمار نے کیا۔ اس دو روزہ آرٹ فیسٹیول میں جھارکھنڈ کے علاوہ ملک کی مختلف ریاستوں اور شہروں کے ساتھ ساتھ نیپال کے مشہور فنکار حصہ لے رہے ہیں۔ اس موقع پر فنکاروں کا خیرمقدم کرتے ہوئے کے روی کمار نے کہا کہ اس کلا سنگم کے ذریعے ووٹر ووٹنگ کے بارے میں بیدار ہوں گے۔ آرٹ فیسٹیول کا مقصد شہری علاقوں میں ووٹنگ کا تناسب بڑھانا ہے۔اس موقع پر جوائنٹ چیف الیکٹورل آفیسر سبودھ کمار نے کہا کہ آرٹ 81 پہلی بار جھارکھنڈ میں منعقد کیا جا رہا ہے جو اپنے آپ میں خاص ہے۔ اس آرٹ فیسٹیول میں ریاست کی 81 اسمبلیوں کی تھیم پر مبنی لائیو پینٹنگز ملک اور ریاستی سطح کے 81 فنکاروں کے ذریعہ کی جارہی ہیں۔ اس کے ذریعے نئے ووٹروں کو راغب کرنے کے لیے کئی تفریحی پروگرام جیسے کوئز مقابلے، تقاریر وغیرہ کا انعقاد کیا جا رہا ہے۔ اس کے علاوہ جھارکھنڈ کے فن اور ثقافت کی جھلک بھی نظر آتی ہے۔
