حیدرآباد: ہر سال 15 اکتوبر کو ہندوستان سمیت دنیا بھر میں عالمی یوم طلباء منایا جاتا ہے۔ یہ دن ہندوستان کے سابق صدر جمہوریہ ڈاکٹر عبدالفاخر زین العابدین عبدالکلام کے یوم پیدائش کی یاد میں منایا جاتا ہے۔ ڈاکٹر کلام کو عام طور پر ‘ہندوستان کے عوامی صدر’ کے نام سے بھی جانا جاتا ہے۔ انہوں نے ملک کے 11ویں صدر (2002 سے 2007 تک) کے طور پر خدمات انجام دیں۔ ملک اور بیرون ملک میں ڈاکٹر اے پی جے عبدالکلام کو علمی، تصنیفی، سائنسی اور دیگر کئی شعبوں میں ان کی انمول خدمات کے لیے بھی جانا جاتا ہے۔ وزیراعظم نریندر مودی نے سابق صدر جمہوریہ ہند ڈاکٹر اے پی جے عبدالکلام کو ان کے یوم پیدائش کے موقع پر خراج عقیدت پیش کیا۔ مودی نے ان کے شائستہ مزاج اور سائنسی صلاحیت کو یاد کیا۔ وزیر اعظم مودی نےکہاکہ میزائل مین کے طور پر معروف ملک کے سابق صدرجمہوریہ ڈاکٹر اے پی جے عبدالکلام جی کو ملک کے تئیں ان کی بے مثال خدمات کے لئے ہمیشہ یاد رکھا جائے گا۔ مودی نے ایکس پر پوسٹ کرتے ہوئے لکھا کہ’’سابق صدر جمہوریہ ڈاکٹر اے پی جے عبدالکلام کو ان کے یوم پیدائش کے موقع پر تہہ دل سے خراج عقیدت پیش کرتا ہوں، جنہیں ان کے عاجزانہ رویے اور غیر معمولی سائنسی صلاحیتوں کی وجہ سے لوگ پسند کرتے تھے۔ قوم کی تعمیر میں ان کی بے مثال خدمات کو ہمیشہ عقیدت کے ساتھ یاد رکھا جائے گا۔‘‘ ڈاکٹر کلام کی یوم پیدائش، 15 اکتوبر کو ‘عالمی یوم طلبہ’ کے طور پر منایا جاتا ہے۔ اقوام متحدہ کی جانب سے اس حوالے سے کوئی باضابطہ اعلان نہیں کیا گیا ہے۔ میڈیا رپورٹس کے مطابق اس وقت کے مرکزی وزیر پرکاش جاوڑیکر نے 2019 میں ڈاکٹر کلام کی یوم پیدائش کو عالمی یوم طلبہ کے طور پر ٹوئٹ کیا تھا۔ ڈاکٹر اے پی جے عبدالکلام کے کردار اور تدریس سے وابستگی کو الفاظ میں بیان نہیں کیا جا سکتا۔ انہیں پڑھانے کا اتنا شوق تھا کہ وہ ہندوستان کے گیارہویں صدر کے عہدے سے سبکدوش ہونے کے اگلے ہی دن دوبارہ تعلیم سے جڑ گیے۔ انہوں نے نومبر 2001 سے انا یونیورسٹی چنئی میں پروفیسر کے طور پر کام کیا۔ ڈاکٹر کلام کا خیال تھا کہ ایک استاد کا کردار، انسانی خصوصیات کی تعمیر، ٹیکنالوجی کے ذریعے بچوں کی سیکھنے کی صلاحیت کو بڑھانا اور اختراعی اور تخلیقی ہونے کا اعتماد پیدا کرنا ہونا چاہیے، جو انہیں مستقبل میں مسابقتی بننے میں مدد دے گا۔
