کیا دہلی روک پائے گی آر سی بی کا راستہ؟

نئی دہلی، 26 اپریل(یو این آئی)آئی پی ایل 2026 کا میلہ اب اپنے پورے شباب پر ہے، لیکن دہلی کیپٹلز کے لیے خطرے کی گھنٹی بج چکی ہے۔ ریکارڈ اسکور بنانے کے باوجود پنجاب کنگز کے خلاف گزشتہ شکست نے دہلی کے کیمپ میں کئی سوالات کھڑے کر دیے ہیں۔ اب کل، یعنی پیر کے روز، دہلی کا سامنا ارون جیٹلی اسٹیڈیم میں موجودہ چیمپئن ‘رائل چیلنجرز بنگلورو‘سے ہوگا۔اس وقت سب کی نظریں دہلی کے اسٹار بلے باز کے ایل راہل پر ٹکی ہیں۔ راہل اس سیزن میں ‘رن مشین‘بن کر ابھرے ہیں۔ پنجاب کے خلاف ان کی 152 رنوں کی ناقابلِ شکست اننگز، جو کسی بھی ہندوستانی کھلاڑی کا آئی پی ایل کی تاریخ میں سب سے بڑا اسکور ہے، ان کی زبردست فارم کا ثبوت ہے۔ 7 اننگز میں 357 رن بنا کر راہل دہلی کی بیٹنگ کی ریڑھ کی ہڈی بن گئے ہیں، لیکن تنہا راہل کی محنت ٹیم کو جیت دلانے کے لیے کافی ثابت نہیں ہو رہی۔دہلی کی سب سے بڑی پریشانی ان کی کمزور بولنگ اور خراب فیلڈنگ ہے۔ 264 رنوں کے پہاڑ جیسے اسکور کا دفاع نہ کر پانا دہلی کے بولنگ اٹیک پر ایک بڑا سوالیہ نشان ہے۔ ٹورنامنٹ میں بنے رہنے کے لیے دہلی کو اپنی ‘کیچنگ‘اور ڈیتھ اوورز کی بولنگ میں فوری سدھار کرنا ہوگا۔دوسری جانب، رائل چیلنجرز بنگلورو کی ٹیم کسی ایک کھلاڑی پر منحصر نہیں ہے۔ ویراٹ کوہلی 328 رنوں کے ساتھ ٹیم کی قیادت کر رہے ہیں، تو وہیں کپتان رجت پاٹیدار مڈل آرڈر میں طوفانی بیٹنگ کر رہے ہیں۔ دیودت پڈیکل اور ٹم ڈیوڈ جیسے کھلاڑیوں کی موجودگی بنگلورو کی بیٹنگ لائن اپ کو انتہائی گہرا اور مضبوط بناتی ہے۔ بھونیشور کمار اور ہیزل ووڈ کی قیادت میں ان کی بولنگ یونٹ بھی وقت پر وکٹ لینے میں ماہر نظر آ رہی ہے۔ارون جیٹلی اسٹیڈیم کی پچ عام طور پر بلے بازوں کے حق میں ہوتی ہے، ایسے میں ایک بار پھر یہاں رنوں کا سیلاب آنے کی امید ہے۔ تاریخ گواہ ہے کہ اس مقابلے میں اکثر بنگلورو کا پلڑا بھاری رہا ہے، لیکن دہلی کو امید ہوگی کہ راہل کا بلا ایک بار پھر چلے اور ٹیم کی فیلڈنگ ان کا ساتھ دے۔