محنت، نظم و ضبط اور مسلسل کوشش ہی کامیابی کی کلید ہے: برلا

نئی دہلی، 23 اپریل (یو این آئی) لوک سبھا اسپیکر اوم برلا نے جمعرات کو کہا کہ محنت، نظم و ضبط اور مسلسل کوشش ہی کامیابی کی حقیقی کلید ہے، اور تحقیق و اختراع ‘وِکست بھارت، کی فکری طاقت کی بنیاد ہے۔مسٹر برلا نے آج دہلی یونیورسٹی کے مہاراجہ اگرسین کالج کی سالانہ تقریب سے خطاب کرتے ہوئے کہا کہ ‘عبدالکلام ریسرچ سینٹر، جیسی کوششیں ملک کو علم پر مبنی معیشت کی طرف لے جاتی ہیں۔ کالج کے ترقیاتی سفر اور تعلیمی ماحول کی تعریف کرتے ہوئے انہوں نے کہا کہ یہ جدید تعلیم کا ایک مضبوط مرکز ہے۔ انہوں نے نوجوانوں کے کردار پر زور دیا اور کہا کہ ہنرمندی کے فروغ ، انٹرپرینیورشپ اور ‘آتم نربھر بھارت ‘ کی تعمیر میں ان کی فعال شرکت لازمی ہے۔ مسٹر برلا نے ماحولیاتی تحفظ، پائیدار ترقی اور ذمہ دارانہ شہریت کو تعلیم کا اٹوٹ حصہ قرار دیتے ہوئے ‘وِکست بھارت 2047’ کے ہدف کے حصول میں نوجوانوں سے قائدانہ کردار ادا کرنے کی اپیل کی۔ مہاراجہ اگرسین کی زندگی کو مشعلِ راہ قرار دیتے ہوئے انہوں نے کہا کہ ان کا عوامی فلاح و بہبود کا طرزِ حکمرانی آج بھی مثالی مانا جاتا ہے۔ انہوں نے کہا کہ مثالی نظامِ حکومت کی بہترین مثال مہاراجہ اگرسین کی زندگی پیش کرتی ہے۔لوک سبھا اسپیکر نے سردار ولبھ بھائی پٹیل کی دور اندیش قیادت کا ذکر کرتے ہوئے کہا کہ ان کی شخصیت ہندوستان کے مضبوط آئینی ڈھانچے کی ترغیب ہے۔ ہندوستان کا پارلیمانی نظام دنیا کے بہترین طرزِ حکمرانی میں سے ایک ہے اور آئین سب کے لیے ایک مثالی رہنما ہے۔ عظیم شخصیات کی زندگی، تاریخ اور خیالات کا مطالعہ نوجوانوں کی شخصیت سازی کے لیے انتہائی ضروری ہے۔ انہوں نے کہا کہ جب نوجوان ان اقدار کو اپنائیں گے تو ان کے اندر خود اعتمادی اور قوم سازی کا جذبہ مزید مضبوط ہوگا۔ انہوں نے اس بات پر زور دیا کہ آج ہندوستانی نوجوانوں کے پاس بے شمار مواقع ہیں اور دنیا کی صفِ اول کی کمپنیوں میں ہندوستانی ٹیلنٹ کی قیادت اس کا واضح ثبوت ہے۔انہوں نے نوجوانوں سے بڑے خواب دیکھنے، اختراع کرنے اور عالمی سطح پر ہندوستان کی قیادت کرنے کا عہد کرنے کی اپیل کی۔ انہوں نے کہا کہ جب ہندوستان اپنی آزادی کے 100 سال مکمل کرے گا، تب ‘وِکست بھارت 2047’ کی تعمیر میں نوجوانوں کا کردار کلیدی ہوگا۔