رائے گنج میں انتخابی ریلی سے راہل گاندھی کاخطاب
رائے گنج، 14 اپریل: مغربی بنگال اسمبلی انتخابات کی تیز ہوتی سیاسی مہم کے درمیان کانگریس کے سینئر رہنما اور لوک سبھا میں اپوزیشن لیڈر راہل گاندھی نے رائے گنج میں ایک عظیم الشان انتخابی ریلی سے خطاب کیا۔ اس موقع پر انہوں نے ریاست کی مجموعی صورتحال، بے روزگاری اور صنعتی مسائل پر توجہ مرکوز کرتے ہوئے کانگریس کے وژن کو عوام کے سامنے رکھا۔
رائے گنج میں کانگریس امیدواروں کی حمایت میں منعقدہ جلسے سے خطاب کرتے ہوئے راہل گاندھی نے کہا کہ بنگال میں نوجوانوں کی مایوسی کو ختم کرنا اور صنعتی شعبے کو دوبارہ فعال کرنا وقت کی اہم ضرورت ہے۔ انہوں نے بے روزگاری کے مسئلے کو سب سے سنگین قرار دیتے ہوئے کہا کہ بنگال کا نوجوان روزگار کی تلاش میں دوسرے صوبوں کی طرف ہجرت کرنے پر مجبور ہے، جبکہ یہاں ایسی اسکیموں کی ضرورت ہے جو نوجوانوں کو مالی استحکام فراہم کر سکیں۔
صنعتی شعبے پر بات کرتے ہوئے راہل گاندھی نے کہا کہ کبھی صنعت و تجارت کا مرکز مانا جانے والا بنگال آج سرمایہ کاری کا منتظر ہے۔ انہوں نے ریاست میں کاروباری ماحول کو بہتر بنانے اور سرمایہ کاری کو فروغ دینے کی ضرورت پر زور دیا تاکہ مقامی سطح پر روزگار کے مواقع پیدا ہو سکیں۔
اس تاریخی تقریب کو کامیاب بنانے میں جھارکھنڈ کے وزیر صحت ڈاکٹر عرفان انصاری اور ریاستی کانگریس کمیٹی کے سابق صدر راجیش ٹھاکر نے کلیدی کردار ادا کیا۔ دونوں سینئر رہنما مسلسل تین دن تک رائے گنج میں مقیم رہے اور پورے پروگرام کی قیادت کی۔ اس کے علاوہ بنگال کے انچارج غلام احمد میر، سینئر لیڈر اور مرشد آباد کے امیدوار ادھیرنجن چودھری اور انچارج پرکاش جوشی سمیت کئی دیگر سرکردہ لیڈروں کی شرکت نے کارکنوں میں نیا جوش بھر دیا۔ راہل گاندھی نے عوام سے اپیل کی کہ وہ کانگریس کے امیدواروں کو بھاری اکثریت سے کامیاب بنا کر ریاست کی تعمیرِ نو میں حصہ لیں۔
