ماسکو کے قریب کار بم دھماکے میں روسی جنرل ہلاک

ماسکو، 25 اپریل (یو این آئی) روس کے دارالحکومت ماسکو کے قریب پارک کی گئی ایک کار میں دھماکہ خیز مواد پھٹ گیا جس کے نتیجے میں ایک سینئر روسی جنرل ہلاک ہوگیا۔ ترک میڈیا کے مطابق حکام نے فوج کے جنرل اسٹاف کے مرکزی آپریشنل ڈائریکٹو ریٹ کے نائب سربراہ جنرل لیفٹیننٹ یاروسلا و موسکالک کو ہلاک ہونے والے شخص کے طور پر نامزد کیا ہے۔تفتیش کاروں کا کہنا ہے کہ انہوں نے ماسکو کے مشرق میں واقع بالاشیکھا قصبے میں رہائیشی عمارت کے باہر وی ڈبلیو گالف کے دھماکے کے بعد قتل اور دھماکہ خیز مواد کی اسمگلنگ کی تحقیقات کا آغاز کیا تھا۔ سوشل میڈیا پر پوسٹ کی گئی تصویروں میں ایک گاڑی میں آگ لگ گئی جس سے گاڑی مکمل طور پر تباہ ہو گئی۔ایجنٹسٹو کی تحقیقاتی نیوز ویب سائٹ نے لیک ہونے والی معلومات کا حوالہ دیتے ہوئے کہا ہے کہ موسکالک بالشیکھا میں رہتا تھا، لیکن گاڑی اس کے پاس رجسٹرڈ نہیں تھی۔ ازویسٹیا ‘ اخبار کی جانب سے پوسٹ کی گئی سیکیور ٹی کیمرے کی فوٹیج میں ایک زوردار دھماکے کو دیکھا جا سکتا ہے، جس کے ٹکڑے فضا میں اڑ رہے ہیں۔ دھماکہ اس وقت ہوا جب کسی کو گاڑ ی کی طرف چلتے ہوئے دیکھا جاسکتا ہے۔تفتیش کاروں کا کہنا ہے کہ دھماکا دیسی ساختہ دھماکہ خیز مواد کے پھٹنے کی وجہ سے ہوا جس میں دھات کے ٹکڑوں کو زیادہ سے زیادہ نقصان پہنچانے کے لیے ڈیزائن کیا گیا تھا۔ کریملن کی ویب سائٹ کے مطابق موسکالک 2015 میں یوکرین کے بارے میں “نارمنڈی فارمیٹ” مذاکرات میں روسی فوجی نمائندے تھے، جب کیف اور روسی حمایت یافتہ علیحدگی پسندوں کے درمیان تنازعہ تھا۔ روسی صدر ولادیمیر پیوٹن نے انہیں 2021 میں جنرل لیفٹیننٹ بنایا تھا۔یہ دھماکہ یوکرین میں ماسکو کی فوجی کارروائی سے منسلک روسیوں پر پچھلے حملوں سے ملتا جلتا معلوم ہوتا ہے۔کیف نے کچھ معاملات میں ذمہ داری قبول کی تھی لیکن جمعے کے روز ہونے والے حملے پر کوئی تبصرہ نہیں کیا ہے۔