یورپی یونین اور بھارت کے ماہرین کا انتہا پسندی کے خلاف حکمت عملی پر تبادلہ خیال

 نئی دلی۔ 20؍ مارچ۔ ایم این این۔نئی دہلی میں منعقدہ رائے سینا ڈائیلاگ کے موقع پر یورپی یونین (EU) نے نیدرلینڈز کے سفارت خانے کے تعاون سے ایک تکنیکی ورکشاپ کا انعقاد کیا، جس کا مقصد پرتشدد انتہا پسندی کی روک تھام اور مقابلہ کرنے کی حکمت عملیوں پر تبادلہ خیال تھا۔ اس ورکشاپ میں یورپی یونین اور بھارتی سیکیورٹی ایجنسیوں اور پالیسی اداروں کے انسداد دہشت گردی کے ماہرین اور سینئر نمائندگان نے شرکت کی۔ یورپی یونین کے وفد میں یورپی یونین کے اداروں، رکن ممالک (بیلجیم، بلغاریہ، جرمنی، نیدرلینڈز( اور اسٹرونگ سٹیز نیٹ ورک (SCN) کے سیکیورٹی ماہرین شامل تھے۔ شرکاء نے حکومت کے تمام شعبوں کی شمولیت پر مبنی حکمت عملیوں، خطرات کی تشخیص کے عمل، انتہا پسندوں کے لیے اخراج پروگرامز، اور دوبارہ انضمام کی حکمت عملیوں پر تبادلہ خیال کیا۔شرکاء نے انسداد دہشت گردی کی کوششوں میں نرم اور سخت دونوں سیکیورٹی اقدامات پر مسلسل تعاون کی اہمیت پر زور دیا۔ میکئی سٹڈیجیک (ڈائریکٹر برائے سیکیورٹی اور دفاعی پالیسی، یورپی ایکسٹرنل ایکشن سروس نے کہا کہ یہ ورکشاپ انسداد دہشت گردی اور سیکیورٹی تعاون میں یوروپی یونین۔بھارت شراکت داری کی گہرائی کا ثبوت ہے۔ مہارت کے تبادلے اور مکالمے کو فروغ دے کر، ہم پرتشدد انتہا پسندی کی روک تھام اور مقابلہ کرنے کی اپنی اجتماعی صلاحیت کو مضبوط بنا رہے ہیں، جبکہ جمہوری اقدار اور انسانی حقوق کو برقرار رکھ رہے ہیں۔ دنکر گپتا سابق ڈائریکٹر جنرل، نیشنل انویسٹی گیشن ایجنسی نے کہا کہ بھارت اور یورپی یونین کو بدلتے ہوئے سیکیورٹی خطرات کا سامنا ہے جو جدید اور مشترکہ حل کا تقاضا کرتے ہیں۔ ایک دوسرے کے تجربات سے سیکھنا ہمیں انتہا پسندی سے بچاؤ، بحالی، اور طویل مدتی روک تھام کے لیے زیادہ مؤثر حکمت عملی بنانے میں مدد دے گا۔یہ ورکشاپ حال ہی میں یورپی کمیشن کے اراکین کے بھارت کے دورے کے بعد منعقد ہوئی، جہاں بھارتی وزیر اعظم نریندر مودی اور یورپی کمیشن کی صدر ارسلا وان ڈیر لیین نے انسداد دہشت گردی میں گہرے تعاون کے عزم کا اعادہ کیا تھا۔ ان کے مشترکہ بیان میں پرتشدد انتہا پسندی کی روک تھام اور مقابلہ کرنے کی اہمیت پر زور دیا گیا تھا۔اس طرح کے تبادلے بھارت اور یورپی یونین کے درمیان سیکیورٹی تعاون کو مضبوط بنانے میں اہم کردار ادا کرتے ہیں، جو عالمی امن اور استحکام کے لیے ضروری ہے۔