پاکستان نے ویسٹ انڈیز کو 127 رنوں سے ہرایا
ملتان، 19 جنوری (آئی این ایس) کپتان شان مسعود (52) کی نصف سنچری کے بعد ساجد خان (پانچ وکٹ) اور ابرار احمد (چار) کی خطرناک گیندبازی کی بدولت پاکستان نے پہلے ٹیسٹ میچ کے تیسرے دن اتوار کے روز ویسٹ انڈیز کو دوسری اننگ میں 123 پر ڈھیر کرتے ہوئے مقابلہ 127 رنوں نے جیت لیا۔ میچ میں کل نو وکٹیں لینے والے ساجد خان کو ‘پلیئر آف دی میچ ‘ کے خطاب سے نوازا گیا۔251 رنز کے ہدف کا تعاقب کرنے اتری ویسٹ انڈیز پاکستانی باؤلنگ اٹیک کا سامنا زیادہ دیر تک نہ کرسکی اور پوری ٹیم 36.3 اوورز میں 123 رنز پر آل آؤٹ ہوگئی۔ ویسٹ انڈیز کے ایلک ایتھنیز نے سب سے زیادہ (55) رنوں کی اننگ کھیلی۔ ٹیون املاچ 14، مائیکل لیوس 13، کریگ بریتھویٹ 12 اور کیون سنکلیئر 10 رنز بنا کر آؤٹ ہوئے۔ پاکستانی باؤلنگ اٹیک کے سامنے ویسٹ انڈیز کے چھ بلے باز دوہرے ہندسے تک بھی نہ پہنچ سکے۔پاکستان کی جانب سے ساجد خان نے 15 اوورز میں 50 رنز دے کر پانچ وکٹیں حاصل کیں۔ ابرار احمد نے 11.3 اوورز میں 27 رنز دے کر چار وکٹ جھٹکے۔ نعمان علی نے ایک بلے باز کو آؤٹ کیا۔اس سے پہلے آج، گیند بازوں کے لیے موزوں پچ پرجومل واریکن (32 رن پر سات وکٹ) کی مہلک گیندبازی کی بدولت ویسٹ انڈیز نے پاکستان کو دوسری اننگ میں 157 رنز پر سمیٹ دیا۔ ویسٹ انڈیز کو جیت کے لیے 251 رنز کا ہدف ملا تھا۔پاکستان نے کل کی دوسری اننگ میں تین وکٹ 109 رنز کے آگے کھیلنا شروع کیا۔ صبح کے سیشن میں سعود شکیل (2) رن بناکر آؤٹ ہوئے۔ انہیں واریکن نے گریویز کے ہاتھوں کیچ آؤٹ کرایا۔ بعد میں واریکن نے محمد رضوان (دو) کو بھی اپنا شکار بنالیا۔ بکے بازی کرنے آئے آغا سلمان نے کامران غلام کے ساتھ مل کر اننگ کو سنبھالنے کی کوشش کی۔ 38ویں اوور میں واریکن نے کامران غلام (27) کو آؤٹ کر کے پاکستان کو چھٹا جھٹکا دیا۔ نعمان علی (دو)، ساجد خان (پانچ) اور خرم شہزاد (صفر) آؤٹ ہوئے۔ 47ویں اوور میں گڈاکیش موتی نے آغا سلمان (14) کو آؤٹ کر کے پاکستان کی دوسری اننگز 157 پر سمیٹ دی۔ پہلی اننگ میں حاصل برتری کی بنیاد پر ویسٹ انڈیز کو جیت کے لیے 251 رنز کا ہدف ملا۔ویسٹ انڈیز کی جانب سے جومل واریکن نے 18 اوورز میں 32 رنز دے کر سات وکٹیں حاصل کیں۔پاکستان نے پہلی اننگ میں 230 رنز بنائے تھے۔ جبکہ ویسٹ انڈیز کی پہلی اننگ 137 کے اسکور پر سمٹ گئی تھی
