جنوبی افریقہ میں کان آپریشن میں 82 کان کنوں کو بچایا گیا، 36 کی موت

جوہانسبرگ، 15 جنوری (یو این آئی) جنوبی افریقہ کے شمال مغربی صوبے اسٹیلفونٹین میں سونے کی کان میں بچاؤ آپریشن کے دوران کل 118 غیر قانونی کان کنوں کو بچایا گیا۔ ان میں سے 36 مزدوروں کی ہلاکت کی تصدیق کی گئی۔ جنوبی افریقی پولیس سروس کی قومی ترجمان ایٹلینڈا متھائی نے کہا کہ منگل کو مقامی وقت کے مطابق شام 4 بجے تک کل 118 غیر قانونی کان کنوں کو نکالا گیا ہے۔ انہوں نے کہا کہ پیر سے شروع ہونے والے آپریشن کے پہلے دن 35 غیر قانونی کان کنوں کو بچایا گیا۔ ان میں سے 9 کی ہلاکت کی تصدیق کی گئی اور دوسرے دن مجموعی طور پر 83 غیر قانونی کان کنوں کو نکالا گیا جن میں سے 27 کی موت ہوچکی ہے۔ انہوں نے کہا کہ تمام 82 گرفتار افراد کو غیر قانونی کان کنی، تجاوزات اور امیگریشن ایکٹ کی خلاف ورزی کے الزامات کا سامنا ہے۔منگل کو بھی، جنوبی افریقہ کے معدنی اور پیٹرولیم وسائل کے وزیر گویڈے منٹاشے اور پولیس کے وزیر سینزو مچونو نے امدادی کارروائیوں کی پیشرفت کا جائزہ لینے کے لیے کان کا دورہ کیا۔وزیر منٹاشے نے اسٹیلفونٹین کی صورتحال کو مجرمانہ قرار دیتے ہوئے اسے غیر ملکیوں کے حملے سے تعبیر کیا۔اسٹیلفونٹین میں بحران مہینوں سے جاری ہے اور اب تک 1500 سے زائد غیر قانونی کان کن سامنے آچکے ہیں۔