تریشا جولی-گایتری گوپی چند نے ملائیشین جوڑی کو شکست دے کر ٹورنامنٹ میں پہلی جیت درج کی
ہانگزو (چین) 12 دسمبر (یو این آئی) ہندوستان کی خواتین ڈبلز بیڈمنٹن جوڑی تریشا جولی اور گایتری گوپی چند نے جمعرات کو بی ڈبلیو ایف ورلڈ ٹور فائنل 2024 ٹورنامنٹ میں ملائیشیا کی جوڑی پرلی ٹین اور تھینا مرلی دھرن کو شکست دی۔آج ٹورنمنٹ میں پہلی بار کھیلنے والی تریشا جولی-گایتری گوپی چند نے انہیں 46 منٹ تک جاری رہنے والے میچ میں21-19،21-19سے شکست دے کر اپنی ناک آؤٹ امیدوں کو زندہ رکھا۔ اس میچ میں ہندوستانی بیڈمنٹن جوڑی نے جارحانہ آغاز کیا اور 6-2 کی برتری حاصل کی لیکن پرلی ٹین-تھینا مرلی دھرن نے واپسی کی اور ہاف وے اسٹیج میں 11-10ی برتری حاصل کی۔ہندوستانی جوڑی نے کھیل کے آخری مراحل میں 19-17پر اہم دو پوائنٹس حاصل کرتے ہوئے پہلا گیم جیت کر اچھی شروعا ت کی۔دوسرے گیم میں پرلی ٹین اور تھینا مرلی دھرن نے اچھی شروعات کی اور 8-5 کی برتری حاصل کی۔ ہندوستانی جوڑ ی نے شاندار کھیل کا مظاہرہ کیا اور کھیل میں واپسی کرتے ہوئے 14-12کی برتری حاصل کی۔ یہ میچ بہت سنسنی خیز رہا۔ 19-19 پر، تریشا اور گایتری نے شاندار کھیل کا مظاہرہ کرتے ہوئے دو پوائنٹس حاصل کیے اور گیم اور میچ جیت لیا۔اس جیت کے ساتھ ہندوستانی بیڈمنٹن کھلاڑی تریشا جولی اور گایتری گوپی چند فی الحال گروپ اے میں دوسرے نمبر پر ہیں۔ چین کی عالمی نمبر ایک جوڑی لیو شینگ شو اور ٹین ننگ دو میچوں میں دو جیت کے ساتھ سیمی فائنل میں پہنچ گئی ہیں۔تریشا گایتری کی ہندوستانی جوڑی کا اگلا مقابلہ جاپان کے نامی ماتسویاما اور چیہارو شیدا سے ہوگا۔ اس میچ میں جیتنے والی جوڑی سیمی فائنل میں پہنچ جائے گی۔
