ای ڈی نے ہماچل پردیش اسکالر شپ گھپلے میں تقریباً چھ کروڑ 25 لاکھ روپے کی پانچ غیر منقولہ جائیدادیں عارضی طور پر قرق کیں

انفورسمنٹ ڈائرکٹوریٹ نے ہماچل پردیش اسکالر شپ گھپلے میں کالے دھن کو جائز بنانے کی روک تھام سے متعلق قانون (PMLA) کے تحت تقریباً چھ کروڑ 25 لاکھ روپے کی پانچ غیر منقولہ جائیدادیں عارضی طور پر قرق کی ہیں۔ ED نے بتایا ہے کہ قرق کی گئی جائیداد راجدیپ سنگھ اور کرشن کمار کی ہیں۔

ED نے بتایا کہ ملزمین نے نقلی اور جھوٹے دستاویزات کی بنیاد پر اسکالر شپس حاصل کی تھیں۔ ہماچل پردیش کی راجدھانی شملہ میں اس سے متعلق CBI کے ذریعے ایک FIR درج کئے جانے کی بنیاد پر ایجنسی نے یہ تحقیقات شروع کی ہے۔

ہماچل پردیش کے اعلیٰ تعلیم سے متعلق شعبے نے پوسٹ میٹرک اسکالرشپ اسکیم کے تحت درج فہرست ذاتوں، درج فہرست قبائل اور دیگر پسماندہ طبقوں کے طلباءکو یہ اسکالرشپ دی گئی تھیں۔