آندھرا پردیش کے کاکی ناڈا ضلع میں ایک بس کے کھڑے ٹرک سے ٹکرا جانے سے 4 افراد کی موت ہو گئی ہے۔ یہ دردناک واقعہ قومی شاہراہ پر پرتھی پاڈو منڈل میں پدلمّا مندر کے قریب پیش آیا۔ دوسری طرف اترپردیش کے جونپور میں بھی ایک سڑک حادثہ پیش آیا جس میں ایک بس کے ٹریکٹر ٹرالی سے ٹکرا جانے کے سبب 6 افراد کی موت ہو گئی۔
پولیس کے مطابق ایک ٹرک جو اڈیشہ سے باپٹلا کی طرف جا رہا تھا، اس کا ٹائر پنکچر ہو گیا تھا اور ڈرائیور نے گاڑی کو سڑک کے کنارے روک دیا تھا۔ اسی دوران آندھرا پردیش اسٹیٹ روڈ ٹرانسپورٹ کارپوریشن (اے پی ایس آر ٹی سی) کی بس وشاکھاپٹنم سے راجہ مہندر ورم جا رہی تھی اور ٹرک کے پیچھے سے ٹکرا گئی۔ اس ٹکر کی وجہ سے ٹرک کے پنکچر درست کرنے والے 3 افراد اور 1 راہگیر موقع پر ہی ہلاک ہو گئے۔ حادثے کے بعد بس ڈرائیور نے گاڑی نہیں روکی اور راجہ مہندر ورم پہنچ گیا۔ پولیس نے مقدمہ درج کر کے تفتیش شروع کر دی ہے۔
دوسری طرف اترپردیش کے جونپور میں ایک بس کے ٹریکٹر ٹرالی سے ٹکرا جانے سے 6 افراد کی موت ہو گئی ہے۔ یہ حادثہ جونپور ضلع میں اتوار کی نصف شب کے قریب اتر پردیش روڈ ویز کی بس کے ایک ٹریکٹر ٹرالی سے ٹکرا جانے سے ہوا۔ حادثہ سمادھ گنج کے قریب ہوا جب روڈ ویز کی بس پریاگ راج سے جونپور آ رہی تھی۔
پولیس کے مطابق مرنے والوں میں سے 5 کی موقع پر ہی موت ہو گئی جبکہ چھٹے شخص کی ضلع ہسپتال میں علاج کے دوران موت ہوئی۔ یہ سبھی مزدور تھے جو علیشا پور گاؤں کے رہنے والے تھے اور ٹریکٹر ٹرالی پر سوار تھے۔ حادثے کی اطلاع ملتے ہی پولیس موقع پر پہنچ گئی اور زخمی مزدوروں کو ضلع اسپتال میں داخل کرایا۔ لاشوں کو پوسٹ مارٹم کے لیے بھیج دیا گیا ہے۔
