مرکزی وزیر منوہر لال کھٹر اور وزیرِ اعلیٰ شوبھیندو ادھیکاری نے ’سوچھ ایپ‘ کا افتتاح کیا

کولکاتہ، 30 مئی (یو این آئی) مرکزی وزیر برائے رہائش و شہری امور اور توانائی منوہر لال کھٹر اور مغربی بنگال کے وزیرِ اعلیٰ شوبھیندو ادھیکاری نے جمعہ کے روز کولکاتہ میں مشترکہ طور پر ’سوچھ ایپ‘ کا افتتاح کیا۔ اس اقدام کے ساتھ ہی ریاست بھر میں شہری صفائی، عوامی خدمات اور بلدیاتی انتظامیہ کو مزید مؤثر بنانے کے لیے ایک جامع مہم کا آغاز بھی کر دیا گیا۔افتتاحی تقریب میں ریاست کی وزیر برائے شہری ترقی و بلدیاتی امور اگنی مترا پال بھی موجود تھیں۔ ایپ کے اجرا کے بعد منوہر لال کھٹر، شوبھیندو ادھیکاری اور اگنی مترا پال نے ایک اعلیٰ سطحی جائزہ اجلاس کی مشترکہ صدارت کی۔اجلاس میں شہری ترقی، بلدیاتی امور اور توانائی کے محکموں کے سینئر افسران سمیت مختلف اہم شعبوں کے نمائندوں نے شرکت کی۔ اس دوران شہری بنیادی ڈھانچے کی بہتری، صفائی کے نظام کو جدید بنانے اور عوامی خدمات کی فراہمی کو مزید مؤثر بنانے کے مختلف منصوبوں پر تبادلۂ خیال کیا گیا۔اجلاس کے بعد صحافیوں سے گفتگو کرتے ہوئے وزیرِ اعلیٰ شوبھیندو ادھیکاری نے کہا کہ ریاستی حکومت متعدد ترقیاتی منصوبوں پر مرکزی حکومت کے ساتھ مل کر کام کر رہی ہے اور اس سلسلے میں حالیہ ہفتوں کے دوران کئی اہم پیش رفت ہوئی ہیں۔انہوں نے بتایا کہ مرکزی وزیر منوہر لال کھٹر نے ان سے رابطہ کرکے مغربی بنگال کی ترقی اور ازسرِنو تعمیر کے لیے مشترکہ کوششوں پر زور دیا تھا۔ وزیرِ اعلیٰ کے مطابق گزشتہ تین ہفتوں کے دوران مرکزی وزراء کے ساتھ کئی ورچوئل اجلاس منعقد کیے گئے ہیں، جن میں مختلف ترقیاتی منصوبوں کا جائزہ لیا گیا۔شوبھیندو ادھیکاری نے مزید کہا کہ قومی صحت مشن اور آیوشمان بھارت جیسی فلاحی اسکیموں کے تحت بھی ریاست میں کام کا آغاز ہو چکا ہے، جس سے عوام کو صحت اور بنیادی سہولتوں کے شعبے میں براہِ راست فائدہ پہنچنے کی توقع ہے۔