تکنیکی شکایات پر وزیر اعلیٰ ممتا بنرجی کی فوری کارروائی کی ہدایت
جدید بھارت نیوز سروس
کولکاتہ :مغربی بنگال حکومت کی یووا ساتھی اسکیم کے تحت بے روزگار نوجوانوں کو ہر ماہ 1500 روپے دینے کا اعلان کیا گیا تھا۔ وزیر اعلیٰ ممتا بنرجی کی ہدایت پر اس مہینے سے مستحقین کے بینک کھاتوں میں رقم جمع ہونا شروع ہو گئی ہے۔ لیکن کئی درخواست دہندگان نے شکایت کی ہے کہ انہیں پیغام تو موصول ہوا ہے مگر ان کے بینک اکاؤنٹ میں ابھی تک رقم جمع نہیں ہوئی۔ان شکایات کو سنجیدگی سے لیتے ہوئے ممتا بنرجی نے فوری جانچ اور مسئلہ حل کرنے کی ہدایت دی ہے۔ نوانو میں ہوئی ایک میٹنگ کے دوران وزیر اعلیٰ نے متعلقہ حکام کو کہا کہ مستحقین کی تمام شکایات کو جلد از جلد دور کیا جائے تاکہ کسی کو پریشانی نہ ہو۔ریاستی بجٹ میں بے روزگار نوجوانوں کی مدد کے لیے یووا ساتھی اسکیم کا اعلان کیا گیا تھا۔
اس اسکیم کے تحت 21 سے 40 سال کی عمر کے نوجوان ہر ماہ 1500 روپے کی مالی مدد حاصل کر سکیں گے۔ حکومت نے یہ بھی شرط رکھی ہے کہ اس اسکیم کے فائدہ اٹھانے والے افراد کو ریاستی حکومت کی کسی دوسری مالی امداد والی اسکیم سے رقم نہیں مل رہی ہونی چاہیے۔شروع میں اعلان کیا گیا تھا کہ اس اسکیم کے تحت رقم اپریل سے دی جائے گی، لیکن بعد میں وزیر اعلیٰ نے اعلان کیا کہ مستحقین کے کھاتوں میں رقم 7 مارچ سے ہی جمع کرائی جائے گی۔ ابتدائی طور پر یہ رقم اگلے پانچ سال تک ہر ماہ دی جائے گی۔حکومتی ذرائع کے مطابق زیادہ تر درخواست دہندگان کے کھاتوں میں رقم جمع ہو چکی ہے اور بہت سے نوجوان اس اسکیم سے فائدہ اٹھا کر خوش ہیں۔ تاہم کچھ لوگوں کی شکایت ہے کہ پیغام موصول ہونے کے باوجود رقم ابھی تک ان کے کھاتوں میں نہیں پہنچی۔وزیر اعلیٰ ممتا بنرجی نے حکام کو ہدایت دی ہے کہ اس مسئلے کو جلد حل کیا جائے تاکہ تمام مستحقین کو بغیر کسی رکاوٹ کے اسکیم کا فائدہ مل سکے۔ درخواست دہندگان کو امید ہے کہ حکومت کی ہدایت کے بعد جلد ہی ان کے کھاتوں میں بھی رقم جمع ہو جائے گی۔
