بنگال کے ووٹروں کے حقوق کے ساتھ چھیڑ چھاڑ ہو سکتی ہے

دوسری ریاستوں سے بڑی تعداد میں فارم-6 درخواستیں جمع کی جا رہی ہیں

ترنمول کانگریس کے قومی جنرل سکریٹری ابھیشیک بنرجی کا الزام

جدید بھارت نیوز سروس
کو لکاتہ 31 مارچ:مغربی بنگال میں انتخابی ماحول کے درمیان ووٹر لسٹ کو لے کر ایک بڑا تنازعہ کھڑا ہو گیا ہے۔ ترنمول کانگریس کے قومی جنرل سکریٹری ابھیشیک بنرجی نے الزام لگایا ہے کہ دوسری ریاستوں سے بڑی تعداد میں فارم-6 درخواستیں جمع کی جا رہی ہیں، جس سے بنگال کے ووٹروں کے حقوق کے ساتھ چھیڑ چھاڑ ہو سکتی ہے۔ انہوں نے اسے جمہوریت کے لیے سنگین خطرہ قرار دیا۔ابھیشیک بنرجی نے کہا کہ یہ کوئی عام عمل نہیں ہے، بلکہ ایک منظم کوشش ہے۔ بی جے پی پر نشانہ لگاتے ہوئے انہوں نے الزام لگایا کہ یہ سب اس کی جانکاری سے ہو رہا ہے اور الیکشن کمیشن اسے نظر انداز کر رہا ہے۔ انہوں نے کہا کہ عوام کو یہ جاننے کا حق ہے کہ ان کے ووٹ کے ساتھ کیا ہو رہا ہے۔مزید بتایا گیا کہ نئے ووٹرز کے نام ووٹر لسٹ میں شامل کرنے کے لیے فارم 6 کا استعمال کیا جاتا ہے۔ ابھیشیک بنرجی نے دعویٰ کیا کہ کئی اضلاع سے اطلاعات موصول ہوئی ہیں کہ اچانک بڑی تعداد میں فارم-6 درخواستیں موصول ہو رہی ہیں۔ انہوں نے کہا کہ ان میں سے بہت سے ایسے لوگ ہو سکتے ہیں جن کا بنگال سے کوئی تعلق نہیں، نہ یہاں رہ رہے ہیں اور نہ ہی کام کر رہے ہیں۔ابھیشیک بنرجی نے ایک مبینہ ویڈیو کلپ کا حوالہ دیا جس میں بڑی تعداد میں فارم جمع کیے جا رہے ہیں۔ اگرچہ اس کی تصدیق نہیں ہوسکی تاہم ان کا کہنا تھا کہ اس طرح کے واقعات سے سوال اٹھتے ہیں کہ اتنی بڑی تعداد میں درخواستیں کیوں موصول ہورہی ہیں اور ان کے پیچھے کیا مقصد ہے۔ابھیشیک بنرجی نے اس معاملے پر ریاست کے چیف الیکٹورل آفیسر منوج اگروال سے ملاقات کی۔ انہوں نے الیکشن کمیشن سے جواب طلب کرتے ہوئے کہا کہ یہ معاملہ منصفانہ انتخابات سے متعلق ہے۔ انہوں نے کہا کہ الیکشن کمیشن شفافیت برقرار رکھے اور عوام کے سوالوں کے جواب دے۔ابھیشیک بنرجی نے کہا کہ یہ محض سیاست کا معاملہ نہیں ہے بلکہ جمہوریت کی بنیاد سے جڑا مسئلہ ہے۔ انہوں نے کہا کہ بنگال میں انتخابی عمل کو متاثر کرنے کی کسی بھی کوشش کو برداشت نہیں کیا جائے گا۔ انہوں نے خبردار کیا کہ ریاست کو اس راستے پر جانے کی اجازت نہیں دی جائے گی جس طرح دوسری ریاستوں میں دیکھا گیا ہے۔