الیکشن کمیشن نے نیشنل ووٹر ہیلپ لائن کا آغاز کیا

کولکاتہ، 30 اکتوبر (یو این آئی) الیکشن کمیشن نے انتخابات سے متعلق سوالات اور شکایات کو حل کرنے کے لیے نیشنل ووٹر ہیلپ لائن شروع کی ہے۔ کمیشن نے تمام ریاستوں اور اضلاع کے لیے بھی ہیلپ لائن شروع کی ہے۔نیشنل ہیلپ لائن پر لوگ صبح 8 بجے سے شام 8 بجے تک ٹول فری نمبر 1800-11-1950 کے ذریعے الیکشن سے متعلق سوالات پوچھ سکتے ہیں یا شکایات درج کر سکتے ہیں۔ قومی رابطہ مرکز (این سی سی) تمام ریاستوں اور مرکز کے زیر انتظام علاقوں کے لیے مرکزی ہیلپ لائن کے مرکز کے طور پر کام کرے گا۔ کمیشن کے مطابق تربیت یافتہ اہلکار شہریوں اور دیگر متعلقہ فریقون کے سوالات کے جوابات دینے کے لیے دستیاب ہوں گے۔الیکشن کمیشن نے ہر ریاست/مرکز کے زیر انتظام علاقہ کو اپنا ریاستی رابطہ مرکز (ایس سی سی) قائم کرنے اور ہر ضلع کو ایک ضلعی رابطہ مرکز (ڈی سی سی) قائم کرنے کی ہدایت دی ہے۔ یہ مراکز سال بھر تمام کام کے دنوں میں دفتری اوقات میں کام کریں گے اور ریاست/مرکز کے زیر انتظام علاقے کی علاقائی زبانوں میں مدد فراہم کریں گے۔الیکشن کمیشن کی طرف سے جاری کردہ نوٹیفکیشن میں کہا گیا ہے کہ تمام شکایات اور سوالات نیشنل گریونس سروس پورٹل (این جی ایس پی 2.0) کے ذریعے رجسٹرڈ اور ٹریک کیے جاتے ہیں۔ مزید برآں، الیکشن کمیشن نے “بُک اے کال ود بی ایل او” فیچر شروع کیا ہے۔ ای سی آئی نیٹ پلیٹ فارم پر دستیاب اس سہولت کے ذریعے شہری اپنے متعلقہ بوتھ لیول آفیسر (بی ایل او) سے براہ راست رابطہ کر سکتے ہیں۔ شہری مخصوص ووٹر ہیلپ لائن نمبر – 1950 کا استعمال کرکے تجاویز، شکایات درج کرا سکتے ہیں یا بی ایل او سے معلومات حاصل کر سکتے ہیں۔الیکشن کمیشن نے تمام چیف الیکٹورل آفیسر، ڈسٹرکٹ الیکٹورل آفیسر اور الیکٹورل رجسٹریشن آفیسر کو ہدایت دی ہے۔
کہ وہ باقاعدگی سے پیش رفت کی نگرانی کریں اور 48 گھنٹوں کے اندر لوگوں کی درخواستوں کا فوری ازالہ یقینی بنائیں۔