چار کھڑکیوں کے شیشے ٹوٹ گئے
جدید بھارت نیوز سروس
جمشیدپور، 21 جنوری:۔ آر پی ایف تحقیقات میں مصروف ہے۔جمشید پور: ملک کی مختلف ریاستوں سے ٹرینوں پر پتھراؤ کے واقعات مسلسل سامنے آرہے ہیں۔ اس دوران جھارکھنڈ کے جمشید پور میں ٹرین پر پتھراؤ کی اطلاع ہے۔ دراصل ہاوڑہ سے ٹاٹا نگر آرہی اسٹیل ایکسپریس ٹرین پر کچھ شرپسندوں نے پتھراؤ کیا۔ جس سے ٹرین کی چار بوگیوں کے شیشے ٹوٹ گئے۔ ساتھ ہی کئی مسافروں کو معمولی چوٹیں بھی آئی ہیں۔ یہ واقعہ گالو ڈیہ اور رکھا مائنز کے درمیان پیش آیا۔ بتایا جا رہا ہے کہ یہاں ٹرین پر اچانک پتھراؤ شروع ہو گیا۔ جس کی وجہ سے ٹرین کے C2 اور D4 ڈبوں کے شیشے ٹوٹ گئے۔ تاہم یہ خوش قسمتی تھی کہ پتھر بازی کے اس واقعہ میں کوئی مسافر شدید زخمی نہیں ہوا۔ مسافروں نے واقعہ کی اطلاع ریلوے حکام کو دی۔اطلاع ملتے ہی ٹاٹا نگر ریلوے اسٹیشن پر ٹرین کو روک دیا گیا۔ آر پی ایف کی ٹیم نے موقع پر پہنچ کر تحقیقات شروع کردی۔ ٹاٹا نگر ریلوے انتظامیہ نے معاملے کو سنجیدگی سے لیتے ہوئے جانچ شروع کردی ہے۔ آر پی ایف کے سینئر عہدیداروں نے بتایا کہ مجرموں کی شناخت کے لئے آس پاس کے علاقے میں گشت بڑھا دیا گیا ہے۔
انہوں نے شرپسند عناصر کے خلاف سخت کارروائی کی یقین دہانی کرائی ہے۔
