سابق الیکشن کمشنر اشوک لواسہ کا انتباہ
کولکاتہ، سابق الیکشن کمشنر اشوک لواسہ نے خبردار کیا ہے کہ دنیا بھر میں جمہوریت بتدریج کمزور ہو رہی ہے اور ہندوستان بھی اس خطرے سے محفوظ نہیں۔ وہ بھارتیہ بھاشا پریشد میں منعقدہ سمپوزیم “جمہوریت کا مستقبل: ہوا میں سوالات” میں کلیدی مقرر کے طور پر خطاب کر رہے تھے، جس کا اہتمام سنسکرت سوربھ نے کیا تھا۔مسٹر لواسہ نے کہا کہ اگرچہ بھارت میں اب تک 18 عام انتخابات پُرامن طریقے سے منعقد ہوئے ہیں اور اقتدار کی منتقلی جمہوری عمل کے ذریعے ہوئی ہے، لیکن الیکشن کمیشن پر عوامی اعتماد میں کمی تشویش کی بات ہے۔ انہوں نے کہا ایک وقت تھا جب الیکشن کمیشن پر عوام کا سب سے زیادہ اعتماد تھا، لیکن اب وہ اعتماد پہلے جیسا نہیں رہا۔انہوں نے یاد دلایا کہ آزادی کے بعد جب ہندوستان میں پہلی مرتبہ انتخابات ہوئے تو تمام شہریوں کو بغیر کسی امتیاز کے ووٹ ڈالنے کا حق دیا گیا — جبکہ برطانیہ اور امریکہ جیسے ممالک کو خواتین کو ووٹ کا حق دینے میں صدیاں لگیں ۔مسٹر لواسہ نے سوال اٹھایا کہ جب سرکاری ملازمتوں کے لیے تعلیم لازمی شرط ہے، تو پھر قانون سازوں کے لیے ایسا کیوں نہیں؟ انہوں نے ڈاکٹر بھیم راؤ امبیڈکر کا حوالہ دیتے ہوئے کہا کہ آج تک کسی بھی سیاسی جماعت نے اپنے انتخابی منشور میں انتخابی اصلاحات پر سنجیدگی سے توجہ نہیں دی۔الیکٹورل بانڈ اسکیم پر تبصرہ کرتے ہوئے سابق کمشنر نے کہا کہ سیاسی جماعتوں کو ملنے والے عطیات ٹیکس فری ہیں، جس سے شفافیت پر سوالات اٹھتے ہیں۔ انہوں نے مزید کہا کہ چونکہ سیاسی جماعتیں آر ٹی آئی قانون کے دائرے سے باہر ہیں، اس لیے وہ کسی بھی سوال کا جواب دینے سے انکار کر سکتی ہیں۔آخر میں، مسٹر لواسہ نے کہا کہ بھارت کے نظریاتی ڈھانچے اور سیاسی شفافیت پر سنجیدہ غور و فکر کی ضرورت ہے۔اس موقع پر ان کے ساتھ اسٹیج پر وجے کنوریا، بمل نولکھا اور دیگر معزز شخصیات بھی موجود تھیں۔
