شہری خدمات متاثر ہونے کا خدشہ
کولکاتہ:مغربی بنگال میں اسپیشل انٹینسیو ریویژن (SIR) کے عمل کا آغاز منگل سے ہو چکا ہے، اور اس سلسلے میں کولکاتہ میونسپل کارپوریشن کے 250 سے زائد ملازمین کو بی ایل او (بوتھ لیول آفیسر) کے طور پر تعینات کیا گیا ہے۔ یہ عمل الیکشن کمیشن کی ہدایت پر انجام دیا جا رہا ہے، جس کے تحت بی ایل اوز کو گھر گھر جا کر فارم تقسیم کرنے اور شہریوں سے درخواستیں جمع کرنے کی ذمہ داری دی گئی ہے۔
ذرائع کے مطابق، یہ عمل ڈیڑھ سے دو ماہ تک جاری رہنے کا امکان ہے۔ اس طویل عرصے کے دوران بڑی تعداد میں ملازمین کی تعیناتی سے کارپوریشن کے روزمرہ انتظامی کاموں پر منفی اثر پڑنے کا خدشہ ہے۔ خاص طور پر ایسے وقت میں جب کارپوریشن کے کئی محکموں میں پہلے ہی سینکڑوں مستقل آسامیاں خالی ہیں اور بیشتر شعبے عارضی یا کنٹریکٹ ملازمین کے ذریعے چلائے جا رہے ہیں۔کارپوریشن کے ایک سینئر افسر نے بتایا موجودہ حالات میں ملازمین پہلے ہی اضافی بوجھ تلے دبے ہوئے ہیں۔ اب ان پر SIR فارم تقسیم کرنے اور شہریوں سے تفصیلات جمع کرنے کی نئی ذمہ داری ڈال دی گئی ہے۔ ایک ہی وقت میں دو الگ نوعیت کے کاموں کو سنبھالنا ممکن نہیں۔ نتیجتاً شہری خدمات میں تاخیر اور بے ترتیبی بڑھ سکتی ہے۔ذرائع کے مطابق، بی ایل او کے طور پر کام کرنے والے ملازمین کو شہریوں کے گھروں تک پہنچ کر فارم تقسیم کرنے، معلومات کی تصدیق کرنے اور ڈیٹا جمع کرنے جیسے وقت طلب فرائض ادا کرنے ہوں گے۔ اس کے باعث وہ اپنے معمول کے دفتر کے فرائض انجام نہیں دے سکیں گے۔ حکام کا کہنا ہے کہ ٹیکس اسسمنٹ، عمارتوں کی منظوری، سڑکوں کی دیکھ بھال، بستیوں کی صفائی، روشنی اور تعلیم جیسے اہم محکموں میں پہلے ہی عملے کی کمی شدید ہے۔ بعض صورتوں میں ایک ہی ملازم تین سے چار وارڈز کی ذمہ داری سنبھال رہا ہے، جب کہ کئی افسران کو ایک سے زیادہ زون یا ڈویژن کی نگرانی کرنی پڑ رہی ہے۔کارپوریشن نے اس مسئلے پر باضابطہ طور پر الیکشن کمیشن کو شکایت درج کرائی ہے۔ حکام کا مؤقف ہے کہ بی ایل او ڈیوٹی کے دوران عملے کی طویل غیر حاضری سے شہری خدمات کے تسلسل میں خلل پڑے گا اور عام شہریوں کو روزمرہ کے کاموں میں دشواریوں کا سامنا کرنا پڑ سکتا ہے۔الیکشن کمیشن کی جانب سے SIR کے دوران بی ایل اوز کو شہریوں کی فہرستوں میں درستگی، نئے ووٹروں کی شمولیت اور خامیوں کی نشاندہی کی ہدایت دی گئی ہے۔
تاہم، شہری انتظامیہ کا کہنا ہے کہ اس عمل میں توازن برقرار رکھنے کے لیے یا تو اضافی عملہ تعینات کیا جائے یا مدت کم کی جائے، تاکہ عوامی سہولیات متاثر نہ ہوں۔
