درست ووٹر کا نام نکالاتو الیکشن کمیشن کا گھیراؤ ہوگا
جدید بھارت نیوز سروس
کولکاتہ: مغربی بنگال کی وزیر اعلیٰ ممتا بنرجی نے ایس آئی آر (اسپیشل انٹینسیو ریویژن) کو لے کر شدید حملہ کرتے ہوئے الزام لگایا ہے کہ یہ پورا عمل مصنوعی ذہانت (AI) کی آڑ میں کیا جانے والا ایک بڑا گھوٹالہ ہے۔ بانکوڑہ میں ایک عوامی ریلی سے خطاب کرتے ہوئے انہوں نے کہا کہ اگر ووٹر لسٹ سے ایک بھی صحیح ووٹر کا نام نکالا گیا تو ترنمول کانگریس دہلی میں الیکشن کمیشن کے دفتر کا گھیراؤ کرے گی۔ممتا بنرجی نے کہا کہ ایس آئی آر کے نام پر ریاست کے عوام کو ہراساں کیا جا رہا ہے۔ ان کے مطابق دستاویزات کی تصدیق کے لیے بزرگ شہریوں کو بار بار بلایا جا رہا ہے اور اس عمل کے سبب اب تک تقریباً 60 لوگوں کی موت ہو چکی ہے۔ انہوں نے دو ٹوک انداز میں کہا کہ ترنمول کانگریس کسی بھی صورت میں درست ووٹروں کے حقوق پر ڈاکہ نہیں ڈالنے دے گی۔وزیر اعلیٰ نے بی جے پی پر نشانہ سادھتے ہوئے کہا کہ مغربی بنگال کے لوگ اس طرح کی زیادتی کو کبھی قبول نہیں کریں گے اور بی جے پی کو ریاست میں اقتدار میں آنے سے روک دیں گے۔ انہوں نے کہا کہ انتخابات کے قریب آتے ہی بی جے پی ’سونار بنگلہ‘ کے نعرے لگاتی ہے، لیکن حقیقت یہ ہے کہ جہاں جہاں بی جے پی کی حکومت ہے وہاں بنگالی بولنے والوں کو تشدد اور نفرت کا سامنا کرنا پڑتا ہے۔ادھر ترنمول کانگریس نے مرکزی وزیر داخلہ امت شاہ کے حالیہ دعوؤں پر بھی سخت ردعمل دیا ہے۔ ریاستی وزیر تعلیم اور سینئر ترنمول لیڈر برتیا باسو نے کہا کہ امت شاہ کے بیانات جھوٹ اور کھوکھلے دعووں پر مبنی ہیں۔ انہوں نے دعویٰ کیا کہ 2026 کے اسمبلی انتخابات میں بی جے پی 50 سیٹوں کا ہندسہ بھی عبور نہیں کر پائے گی اور اسے شرمناک شکست کا سامنا کرنا پڑے گا۔برتیا باسو نے طنزیہ انداز میں کہا کہ امت شاہ ایک سیاح کی طرح آتے جاتے رہیں گے، لیکن ان دوروں سے زمینی حقیقت بدلنے والی نہیں ہے۔ ترنمول کانگریس نے واضح کر دیا ہے کہ وہ ووٹروں کے حقوق کے تحفظ کے لیے سڑک سے لے کر دہلی تک ہر سطح پر لڑائی لڑے گی۔
