عوام سے الیکشن کمیشن کے رویے کے خلاف بڑے اتحاد کا مطالبہ
کولکاتہ : مغربی بنگال کی وزیر اعلیٰ ممتا بنرجی نے ذات پات اور مذہب کی بنیاد پر کی جانے والی سیاست کو سختی سے مسترد کرتے ہوئے واضح کیا ہے کہ وہ اس طرح کی تفریق پر یقین نہیں رکھتیں۔ شمالی بنگال کے چالسہ میں واقع بٹا باری مہا باری چرچ میں ایک تقریب سے خطاب کرتے ہوئے انہوں نے کہا کہ بنگال میں تمام مذاہب کو برابر کا احترام اور مقام حاصل ہے اور یہاں کے لوگ ہر تہوار اور عبادت کی خوشیوں میں ایک دوسرے کے ساتھ مل کر شریک ہوتے ہیں۔ انہوں نے زور دے کر کہا کہ ریاست کے اندر مختلف عقائد کے ماننے والے مکمل اتحاد اور بھائی چارے کے ساتھ رہتے ہیں اور یہی بنگال کی اصل پہچان ہے۔شمالی بنگال کے انتخابی دورے پر روانہ ہونے سے قبل کولکاتہ میں میڈیا نمائندوں سے گفتگو کرتے ہوئے ممتا بنرجی نے بھارتیہ جنتا پارٹی اور الیکشن کمیشن آف انڈیا پر شدید تنقید کی۔ انہوں نے الزام لگایا کہ بی جے پی انتخابات سے خوفزدہ ہے اور اسی لیے وہ الیکشن کمیشن کو اپنے آلے کے طور پر استعمال کر رہی ہے۔ وزیر اعلیٰ نے الیکشن کمیشن کی جانبداری پر سوال اٹھاتے ہوئے کہا کہ کمیشن کے لیٹر ہیڈ پر بی جے پی کی مہر لگی ہوئی محسوس ہوتی ہے اور انتخابات کے اعلان کے بعد سے ریاست کے اعلیٰ انتظامی افسران کے مسلسل تبادلے بی جے پی کے اشارے پر کیے جا رہے ہیں۔ انہوں نے عوام کو خبردار کیا کہ لوگوں سے ان کے ووٹ کا حق چھیننے کی کوششیں کی جا رہی ہیں لیکن عوام کی طاقت ہی اس نظام کے پتن کا سبب بنے گی۔وزیر اعلیٰ نے الیکشن کمیشن کے موجودہ رویے کے خلاف عوام اور تمام سیاسی قوتوں سے ایک وسیع تر اتحاد بنانے کی اپیل کی۔ انہوں نے دوٹوک الفاظ میں کہا کہ یہ وقت سیاسی اختلافات کو بھول کر جمہوریت کو بچانے کا ہے، اس لیے لوگوں کو یہ سوچنا چھوڑ دینا چاہیے کہ کون بائیں بازو (لیفٹ) سے ہے اور کون دائیں بازو (رائٹ) سے تعلق رکھتا ہے۔ ممتا بنرجی نے عوام سے کہا کہ انہیں ذاتی طور پر میرے ساتھ کھڑے ہونے کی ضرورت نہیں ہے بلکہ وہ اس غیر منصفانہ نظام کے خلاف جاری لڑائی میں شامل ہو جائیں تاکہ ملک کے جمہوری ڈھانچے کو محفوظ رکھا جا سکے۔
