آسان قرض کے نام پر دھوکہ دہی، وزیراعلیٰ کے نام سے چل رہا جعلی کھیل بے نقاب

جدید بھارت نیوزسروس
کولکاتہ:مغربی بنگال میں ایک خطرناک لون فراڈ کا انکشاف ہوا ہے، جس میں وزیراعلیٰ ممتا بنرجی کے نام اور تصویر کا غلط استعمال کرتے ہوئے عام لوگوں کو آسان قرض کا لالچ دیا جا رہا ہے۔ سوشل میڈیا پلیٹ فارمز پر جعلی اشتہارات اور ویڈیوز کے ذریعے دعویٰ کیا جا رہا ہے کہ حکومت کی منظور شدہ اسکیموں کے تحت بغیر کسی پیچیدہ عمل اور سول اسکور کے فوری قرض فراہم کیا جائے گا۔ تاہم مغربی بنگال پولیس نے واضح کیا ہے کہ یہ تمام دعوے سراسر جھوٹ اور فراڈ ہیں۔ریاستی پولیس کے مطابق فیس بک، واٹس ایپ اور دیگر سوشل میڈیا پلیٹ فارمز پر ایسے اشتہارات گردش کر رہے ہیں، جن میں نامعلوم لنکس یا موبائل ایپس کے ذریعے لوگوں کو قرض کے لیے درخواست دینے کو کہا جا رہا ہے۔ ان لنکس یا ایپس کے ذریعے درخواست دہندگان سے آدھار کارڈ، پین کارڈ، بینک تفصیلات اور یہاں تک کہ او ٹی پی بھی حاصل کیے جا رہے ہیں۔ بعض معاملات میں ایڈوانس رقم جمع کرانے کا مطالبہ کیا جا رہا ہے۔ رقم وصول کرنے کے بعد جعلساز رابطہ منقطع کر دیتے ہیں اور متاثرہ افراد کو مالی نقصان اٹھانا پڑتا ہے۔مغربی بنگال پولیس نے سوشل میڈیا کے ذریعے عوام کو خبردار کیا ہے کہ وزیراعلیٰ ممتا بنرجی یا ریاستی حکومت کی جانب سے اس طرح کی کسی بھی لون اسکیم کا نہ تو اعلان کیا گیا ہے اور نہ ہی منظوری دی گئی ہے۔ لہٰذا وزیراعلیٰ کی تصویر یا نام استعمال کرنے والے تمام قرض کے اشتہارات جعلی ہیں اور ان پر ہرگز یقین نہ کیا جائے۔پولیس نے عوام کو سختی سے مشورہ دیا ہے کہ:کسی بھی نامعلوم لنک پر کلک نہ کریںمشتبہ ایپس انسٹال کرنے سے گریز کریںکسی کو بھی اپنا او ٹی،بینک تفصیلات یا شناختی دستاویزات فراہم نہ کریںسول اسکور کے بغیر یا بغیر تصدیق کے قرض دینے کے دعوؤں سے ہوشیار رہیںاگر کوئی شخص اس طرح کی دھوکہ دہی کا شکار ہو جاتا ہے یا اسے کسی مشتبہ اشتہار یا کال کا سامنا ہوتا ہے تو فوری طور پر سائبر کرائم ہیلپ لائن 1930 پر شکایت درج کرانے یا مغربی بنگال حکومت کی سائبر کرائم ویب سائٹ پر رپورٹ کرنے کی اپیل کی گئی ہے۔ پولیس نے یہ بھی مشورہ دیا ہے کہ کسی بھی مشتبہ لین دین کی صورت میں اسکرین شاٹس، لنکس اور فون نمبرز کو محفوظ رکھا جائے تاکہ تحقیقات میں مدد مل سکے۔پولیس کا کہنا ہے کہ اس فراڈ نیٹ ورک کے پیچھے موجود افراد کی شناخت کی جا رہی ہے اور معاملے کی مکمل تفتیش جاری ہے۔ حکام نے یقین دہانی کرائی ہے کہ اس گھوٹالے میں ملوث افراد کے خلاف سخت قانونی کارروائی کی جائے گی۔ عوام سے اپیل کی گئی ہے کہ قرض کے لیے صرف مستند بینکوں، رجسٹرڈ این بی ایف سی یا سرکاری ویب سائٹس کا ہی استعمال کریں اور کسی بھی مشتبہ پیشکش سے ہوشیار رہیں۔