مودی شمال میں تو ممتا جنوب میں سرگرم
کولکاتہ :مغربی بنگال اسمبلی انتخابات کے قریب آتے ہی ریاست میں سیاسی سرگرمیاں مزید تیز ہو گئی ہیں اور آج اتوار کو بنگال کی سیاست میں طاقت کا بڑا مظاہرہ دیکھنے کو مل رہا ہے۔ ایک طرف وزیر اعظم نریندر مودی اور بی جے پی کی مرکزی قیادت انتخابی مہم میں پوری قوت کے ساتھ سرگرم ہے، تو دوسری جانب وزیر اعلیٰ ممتا بنرجی اور ترنمول کانگریس بھی ریاست بھر میں بھرپور مہم چلا رہی ہے۔آج ترنمول سپریمو ممتا بنرجی ایک ہی دن میں چار مختلف مقامات پر انتخابی جلسے کر رہی ہیں، جبکہ بی جے پی نے اپنی انتخابی مہم کو مزید مضبوط بنانے کے لیے تین ریاستوں کے وزرائے اعلیٰ کو بھی بنگال کے میدان میں اتار دیا ہے۔بی جے پی کی جانب سے اتر پردیش کے وزیر اعلیٰ یوگی آدتیہ ناتھ، آسام کے وزیر اعلیٰ ہیمنت بسوا سرما اور دہلی کی وزیر اعلیٰ ریکھا گپتا مختلف علاقوں میں پارٹی امیدواروں کے حق میں انتخابی ریلیاں اور جلسے کر رہے ہیں۔ پارٹی اس کے ذریعے بنگال میں اپنی طاقت کا بھرپور مظاہرہ کرنا چاہتی ہے۔ سیاسی مبصرین کے مطابق یہ پہلا موقع ہے جب وزیر اعظم بنگال میں مسلسل اتنی بڑی تعداد میں ریلیاں کر رہے ہیں، جس سے صاف ظاہر ہے کہ بی جے پی اس بار بنگال کے انتخابات کو انتہائی سنجیدگی سے لے رہی ہے۔دوسری جانب ممتا بنرجی آج کھنڈ گھوش، اوندا، چھتنا اور آسنسول میں جلسوں سے خطاب کر رہی ہیں، جہاں وہ ترنمول امیدواروں کے حق میں ووٹ مانگنے کے ساتھ ساتھ بی جے پی پر وعدہ خلافی اورجملہ بازی کے الزامات بھی عائد کر رہی ہیں۔ترنمول کانگریس کے آل انڈیا جنرل سیکریٹری ابھیشیک بنرجی بھی آج دو اہم انتخابی جلسوں میں شرکت کر کے پارٹی کی مہم کو مزید تقویت دے رہے ہیں۔سیاسی مبصرین کا کہنا ہے کہ جیسے جیسے ووٹنگ کی تاریخ قریب آ رہی ہے، ویسے ویسے بنگال میں انتخابی ماحول مزید گرم ہوتا جا رہا ہے۔ بی جے پی اور ترنمول دونوں اس الیکشن کو وقار کی جنگ مان کر پوری طاقت کے ساتھ میدان میں اتر چکی ہیں۔آنے والے دنوں میں ریاست بھر میں مزید بڑی ریلیوں، جلسوں اور روڈ شوز کی توقع ہے، جس سے واضح ہے کہ بنگال کی سیاسی جنگ اب اپنے فیصلہ کن مرحلے میں داخل ہو چکی ہے۔
