روزانہ 500 سرٹیفکیٹس جاری کرنے کا ہدف
کولکاتہ:کولکاتہ میونسپل کارپوریشن میں اسپیشل انٹینسیو ریویو (SIR) کے آغاز کے بعد پیدائش اور موت کے سرٹیفکیٹس کے لیے آنے والوں کی تعداد میں زبردست اضافہ ہو گیا ہے۔ جیسے ہی SIR کا عمل شروع ہوا، شہری بڑی تعداد میں کارپوریشن دفتر پہنچنے لگے، جس کی وجہ سے ہیڈ کوارٹر میں شدید بھیڑ دیکھی جا رہی ہے۔
روزانہ سینکڑوں لوگ اپنے پیدائش یا موت کے سرٹیفکیٹ کے حصول کے لیے قطاروں میں کھڑے نظر آ رہے ہیں۔ بڑھتے ہوئے ہجوم کو دیکھتے ہوئے کولکتہ کے میئر فرہاد حکیم نے خصوصی ہدایات جاری کیں، جس کے بعد پیر سے کارپوریشن میں بہتر اور تیز خدمات فراہم کرنے کے لیے خصوصی انتظامات نافذ کر دیے گئے۔
کارپوریشن نے دو خصوصی ڈیسک قائم کیے ہیں جبکہ سرٹیفکیٹس جاری کرنے والے عملے کی تعداد میں بھی واضح اضافہ کیا گیا ہے۔ ان اقدامات نے کام کی رفتار میں نمایاں بہتری پیدا کی ہے۔
کے ایم سی کے محکمہ صحت کی چیف ہیلتھ آفیسر، ڈاکٹر رونیتا سینگپتا کے مطابق پہلے روزانہ 150 سے 156 سرٹیفکیٹس جاری ہوتے تھے، لیکن اب یہ تعداد بڑھ کر 240 یومیہ ہو گئی ہے۔ انہوں نے بتایا کہ کارپوریشن کا نیا ہدف روزانہ 300 سے 500 سرٹیفکیٹس جاری کرنا ہے تاکہ عوام کو مزید سہولت مل سکے۔
ڈاکٹر سینگپتا نے یہ بھی بتایا کہ SIR کے نفاذ کے بعد محکمہ پاسپورٹ بھی پیدائش کے تقریباً 150 سرٹیفکیٹس روزانہ تصدیق کے لیے KMC کو بھیج رہا ہے، جس سے کام کا بوجھ مزید بڑھ گیا ہے۔
افسران کا کہنا ہے کہ بہت سے لوگ صرف آدھار کارڈ یا ووٹر کارڈ لے کر پرانے سرٹیفکیٹس حاصل کرنے کے لیے پہنچ جاتے ہیں، جبکہ وہ مطلوبہ دستاویزات نہیں لاتے۔ اس سے عملے کا کام متاثر ہوتا تھا، اسی لیے شہریوں کی بہتر رہنمائی کے لیے دو خصوصی ڈیسک بنائے گئے ہیں۔
مزید سہولت کے لیے مختلف بورو سے صحت اور برتھ رجسٹریشن ونگ کے 13 تجربہ کار اہلکاروں کو ہیڈ کوارٹر منتقل کیا گیا ہے۔ جلد ہی اضافی تربیت یافتہ عملہ بھی تعینات کیا جائے گا تاکہ روزانہ آنے والے ہزاروں شہریوں کو بغیر کسی پریشانی کے خدمات فراہم کی جا سکیں۔
کے ایم سی کے مطابق خصوصی مہم جاری رہے گی، جبکہ SIR کا عمل بھی اپنی رفتار کے ساتھ جاری ہے، اور شہریوں کو سرٹیفکیٹس کے حصول میں زیادہ تیزی اور آسانی فراہم کی جائے گی۔
