41 لاکھ روپے نقد اور دستاویزات برآمد، عدالت نے عبوری ضمانت برقرار رکھی
بدھان نگر: جیل کے وزیر اور ترنمول کانگریس کے سینئر رہنما چندر ناتھ سنہا ایک بار پھر پرائمری ٹیچر بھرتی بدعنوانی کیس میں ای ڈی (انفورسمنٹ ڈائریکٹوریٹ) کے سامنے پیش ہوئے۔ مرکزی تفتیشی ایجنسی پہلے بھی دو بار ان سے پوچھ گچھ کر چکی ہے، لیکن آج بدھ کو دوبارہ انہیں طلب کیا گیا۔
سالٹ لیک میں ای ڈی کے دفتر پہنچنے کے بعد وزیر چندر ناتھ سنہا صحافیوں سے بات نہیں کی، تاہم ان کے ہاتھوں میں کئی فائلیں اور دستاویزات نظر آئیں، جس پر قیاس آرائیاں شروع ہو گئی ہیں کہ وہ کوئی اہم دستاویزات جمع کرانے آئے تھے۔
ای ڈی ذرائع کے مطابق، بھرتی بدعنوانی کے معاملے میں کنتل گھوش کی ملی ڈائری میں 100 سے زیادہ نام درج ہیں، جن میں چندر ناتھ سنہا کا نام بھی شامل ہے۔ اس کے بعد ایجنسی نے کئی بار وزیر کے گھر تلاشی لی، جس کے دوران متعدد اہم دستاویزات اور 41 لاکھ روپے کی نقدی برآمد ہوئی تھی۔
اس مقدمے میں ای ڈی نے پہلے ہی عدالت میں چندر ناتھ سنہا کے خلاف چارج شیٹ پیش کی ہے، جس کے بعد وزیر نے خودسپردگی دی اور پیشگی ضمانت کی درخواست دائر کی۔ ای ڈی نے عدالت سے استدعا کی کہ انہیں وزیر کی تحویل میں لیا جائے تاکہ کیس میں موجود تمام روابط کی مکمل تحقیقات کی جا سکیں۔
تاہم سماعت کے دوران عدالت نے ای ڈی سے سوال کیا کہ مارچ 2024 میں گھر کی تلاشی کے باوجود 11 ماہ تک کارروائی کیوں نہیں کی گئی۔ جج نے اس معاملے پر سخت تشویش کا اظہار کیا۔
طویل سماعت کے بعد بینکشال کورٹ نے عبوری ضمانت برقرار رکھی اور واضح کیا کہ تفتیش میں ہر ممکن تعاون فراہم کیا جائے۔ اس کیس میں اب مزید قانونی کارروائی اور ای ڈی کی تحقیقات جاری رہنے کی توقع ہے۔
