مودی حکومت کے زوال کی شروعات ہے:وزیر اعلی ممتا بنرجی
جدید بھارت نیوز سروس
ہاوڑہ، 18 اپریل:مغربی بنگال کی وزیر اعلیٰ اور ترنمول کانگریس کی سربراہ ممتا بنرجی نے بھارتیہ جنتا پارٹی (بی جے پی) پر شدید تنقید کرتے ہوئے دعویٰ کیا ہے کہ پارلیمنٹ میں حالیہ حد بندی بل پر حکمران جماعت کی ناکامی دراصل نریندر مودی حکومت کے خاتمے کی شروعات ہے۔ ہاوڑہ ضلع میں ایک بڑی انتخابی ریلی سے خطاب کرتے ہوئے انہوں نے کہا کہ بی جے پی اپنے سیاسی مفادات کے حصول کے لیے لوک سبھا کی نشستوں کی دوبارہ ترتیب اور حد بندی کے ذریعے ملک کی ریاستوں کے خلاف سازش کر رہی تھی، جسے متحدہ اپوزیشن نے اپنی حکمت عملی سے ناکام بنا دیا ہے۔ممتا بنرجی نے اس بات پر فخر کا اظہار کیا کہ مغربی بنگال میں اسمبلی انتخابات کی گہما گہمی کے باوجود ترنمول کانگریس کے اراکینِ پارلیمنٹ نے دہلی پہنچ کر بل کی مخالفت میں ووٹ دیا۔ انہوں نے انکشاف کیا کہ بی جے پی کو شکست دینے کے لیے انہوں نے خصوصی طور پر 21 اراکینِ پارلیمنٹ کو دہلی بھیجا تاکہ اپوزیشن کے اتحاد کو مضبوط کیا جا سکے۔ ان کا کہنا تھا کہ ٹی ایم سی نے اس پورے عمل میں کلیدی کردار ادا کیا ہے اور پارلیمنٹ میں بی جے پی کی یہ شکست اس بات کا ثبوت ہے کہ اب ان کی آمریت مزید نہیں چلے گی۔وزیر اعلیٰ نے بی جے پی پر دھوکہ دہی کا الزام لگاتے ہوئے کہا کہ خواتین کے ریزرویشن بل کی آڑ میں مرکزی حکومت دراصل حد بندی کے اپنے خفیہ ایجنڈے کو آگے بڑھانا چاہتی ہے۔ انہوں نے دعویٰ کیا کہ بی جے پی کا منصوبہ لوک سبھا کی نشستوں کو 543 سے بڑھا کر تقریباً 850 تک لے جانا ہے تاکہ سیاسی بساط کو مستقل طور پر اپنے حق میں کر لیا جائے۔ ممتا بنرجی نے واضح کیا کہ ان کی پارٹی خواتین کے حقوق اور ریزرویشن کی مکمل حمایت کرتی ہے، لیکن وہ ملک کو تقسیم کرنے والی یا ریاستوں کے حقوق پر ڈاکہ ڈالنے والی کسی بھی پالیسی کو قبول نہیں کریں گی۔اپنے خطاب کے آخر میں ممتا بنرجی نے کہا کہ تاریخ گواہ ہے کہ بنگال نے ہمیشہ ملک کو راستہ دکھایا ہے۔ انہوں نے دعویٰ کیا کہ پارلیمنٹ کے بعد اب بی جے پی کو زمینی سطح پر بھی عبرتناک شکست کا سامنا کرنا پڑے گا۔ انہوں نے کارکنوں اور حامیوں پر زور دیا کہ وہ مغربی بنگال میں ٹی ایم سی کی بھاری اکثریت سے جیت کو یقینی بنائیں تاکہ مرکز کو یہ مضبوط پیغام جائے کہ بنگال کی عوام جھوٹے پروپیگنڈے اور گمراہ کن سیاست کو مسترد کر چکی ہے۔ انہوں نے بی جے پی کو خبردار کیا کہ اقتدار سے ان کی رخصتی کا الٹی گنتی شروع ہو چکی ہے۔
