بدعنوانی پر قابو پانے کیلئے وزیر اعلیٰ نے اے سی بی کے تحت فلائنگ اسکواڈ بنانے کی ہدایات دی
جدید بھارت نیوز سروس
رانچی، 23 دسمبر:۔ جھارکھنڈ کے وزیر اعلیٰ ہیمنت سورین نے بدعنوانی کے خلاف اپنی حکومت کی زیرو ٹالرنس پالیسی کو دہرایا ہے اور بدعنوانی کے خلاف سخت کارروائی کرنے کا اعلان کیا ہے۔ وزیر اعلیٰ نے ڈی جی پی سمیت ریاست کے سینئرعہدیداروں کے ساتھ میٹنگ کی اور سرکل اور بلاک دفاتر میں بدعنوانی کی شکایات پر کارروائی تیز کرنے کی ہدایات دیں۔ وزیراعلیٰ نے کہا کہ میں نے زونل دفاتر میں بدعنوانی کی شکایات کو سنجیدگی سے لیتے ہوئے سخت کارروائی کا حکم دیا ہے، اس بات کو یقینی بنایا جائے گا کہ عوام کو کسی قسم کی تکلیف کا سامنا نہ کرنا پڑے اور کوئی کرپٹ ملازم بچ نہ سکے۔ بدعنوانی پر قابو پانے کیلئے وزیر اعلیٰ نے اینٹی کرپشن بیورو (اے سی بی) کے تحت فلائنگ اسکواڈ بنانے کی ہدایات دی ہیں۔ یہ اسکواڈ زونل اور بلاک دفاتر میں اچانک معائنہ اور چھاپے ماریں گے۔ وزیراعلیٰ نے کہا کہ یہ کارروائیاں پوری شدت سے اور تسلسل کے ساتھ کی جائیں گی تاکہ انتظامی سطح پر شفافیت برقرار رہے۔ اپنی ترجیح کو واضح کرتے ہوئے وزیر اعلیٰ ہیمنت سورین نے کہا، “میرا پہلا ہدف عوام کو فوری اور شفاف خدمات فراہم کرنا ہے۔ اب بدعنوان اہلکاروں کے خلاف سخت ترین کارروائی کو یقینی بنایا جائے گا۔” جھارکھنڈ حکومت کے اس قدم سے توقع ہے کہ انتظامی اصلاحات میں تیزی آئے گی اور عوام میں اعتماد بحال ہوگا۔ یہ اقدام ریاست میں گڈ گورننس کے قیام کی سمت ایک اہم قدم ہے۔
وزیر اعلیٰ نے میّاں سمان یوجنا پروگرام کی تیاریوں کا جائزہ لیا
وزیر اعلیٰ ہیمنت سورین نے 28 دسمبر کو منعقد ہونے والے تاریخی جھارکھنڈ وزیر اعلیٰ میاں سمان یوجنا (جے ایم ایم ایس وائی) پروگرام کی تیاریوں کے سلسلے میں ایک اعلیٰ سطحی جائزہ میٹنگ کی۔ اس میٹنگ میں ریونیو کی وصولی اور جھارکھنڈ اسٹاف سلیکشن کمیشن (JSSC) سے متعلق اہم مسائل پر بھی تبادلہ خیال کیا گیا۔ اپنی رہائش گاہ پر ہونے والی اس میٹنگ میں وزیر اعلیٰ نے اعلیٰ حکام پر زور دیا کہ وہ پروگرام کی کامیابی اور متعلقہ محکموں کے تال میل کو یقینی بنائیں۔ نیز اسکیموں کو موثر انداز میں نافذ کرنے کی ہدایات جاری کیں۔ وزیر اعلیٰ نے کہا کہ ان کی حکومت کی ترجیح یہ ہے کہ اسکیموں کے فائدے جھارکھنڈ کے لوگوں تک جلد پہنچیں اور ریاست کے ریونیو کی وصولی کو مضبوط کیا جائے۔ اس میٹنگ کے ذریعے انتظامی عمل کو مزید مضبوط بنانے کیلئے اقدامات کیے گئے۔
