ٹی 20 ورلڈ کپ 2026: آئی سی سی کی بنگلہ دیش سے فیصلے پر نظرثانی کی اپیل، بنگلہ دیشی بورڈ اپنے فیصلے پر قائم

ڈھاکہ، 13 جنوری (یو این آئی ) انٹرنیشنل کرکٹ کونسل (آئی سی سی) اور بنگلہ دیش کرکٹ بورڈ کے اعلیٰ حکام کے درمیان منگل کے روز ایک اہم ویڈیو کانفرنس منعقد ہوئی۔ اس میٹنگ میں آئی سی سی نے بی سی بی سے درخواست کی ہے کہ وہ ورلڈ کپ میں شرکت کے حوالے سے اپنے مؤقف پر دوبارہ غور کرے، تاہم بنگلہ دیشی بورڈ تاحال اپنے فیصلے پر قائم ہے۔بی سی بی کےصدر امین الاسلام اور دیگر اعلیٰ حکام نے واضح کیا کہ کھلاڑیوں اور آفیشلز کی سلامتی پر کوئی سمجھوتہ نہیں کیا جائے گا۔ انہوں نے اپنا مطالبہ دہرایا کہ بنگلہ دیش کے میچز ہندوستان سے باہر منتقل کیے جائیں۔ آئی سی سی حکام نے کہا کہ ٹورنامنٹ کا شیڈول پہلے ہی جاری ہو چکا ہے اور اس مرحلے پر تبدیلی مشکل ہے۔ اسی لیے انہوں نے بنگلہ دیش سے اپنے فیصلے پر دوبارہ غور کرنے کی درخواست کی۔ بنگلہ دیشی حکومت کے مشیر برائے کھیل آصف نزرول بھی متعدد بار کہہ چکے ہیں کہ موجودہ حالات میں ٹیم کا ہندوستان جانا ممکن نہیں ہے۔اگرچہ دونوں فریقین فی الحال اپنے اپنے مؤقف پر قائم ہیں، لیکن انہوں نے اتفاق کیا ہے کہ کسی تعمیری حل تک پہنچنے کیلئےبات چیت کا سلسلہ جاری رکھا جائے گا۔