وجے ہزارے ٹرافی میں کئی ریکارڈ پاش پاش
رانچی/احمد آباد، 24 دسمبر(یو این آئی )آج کا دن ہندوستانی گھریلو کرکٹ کی تاریخ میں سنہری حروف سے لکھا جائے گا۔ وجے ہزارے ٹرافی کے پہلے ہی دن ریکارڈز کی ایسی بارش ہوئی کہ پرانے تمام اعداد و شمار قصہ پارینہ بن گئے۔ اس تاریخی دن کا محور تین ‘بہاری کھلاڑی ثاقب الغنی، وئبھو سوریہ ونشی اور ایشان کشن رہے، جنہوں نے اپنی پاور ہٹنگ سے کرکٹ کی دنیا کو حیران کر دیا اور یہ بھی ثابت کر دیا کہ ہندوستانی کرکٹ کا ٹیلنٹ خاص طور پر بہار اور جھارکھنڈ کے خطے سے کس تیزی سے ابھر رہا ہے۔ ایک ہی دن میں تین برق رفتار سنچریاں اور ایک عالمی ریکارڈ اسکور اس بات کی گواہی ہے کہ کرکٹ کا انداز اب مکمل طور پر بدل چکا ہے۔ثاقب الغنی بہار ٹیم کے کپتان ہیں، جب کہ ویبھو بہار کے اوپنر ہیں۔ ایشان جھارکھنڈ کے لیے کھیلتے ہیں، لیکن ان کا خاندان بہار میں رہتا ہے اور وہ بہار سے ہیں۔بہار ٹیم کے کپتان ثاقب الغنی نے وہ کارنامہ انجام دیا جو اس سے قبل کوئی ہندوستانی نہ کر سکا تھا۔ انہوں نے اروناچل پردیش کے خلاف محض 32 گیندوں پر سنچری داغ کر ہندوستان کی طرف سے لسٹ-اے کرکٹ میں تیز ترین سنچری کا ریکارڈ اپنے نام کر لیا۔ 40 گیندوں پر ناٹ آؤٹ 128 رنز۔ 10 چوکے اور 12 فلک بوس چھکے۔ انہوں نے اپنی ہی ٹیم کے اوپنر وئبھو کا ریکارڈ محض ایک گھنٹے کے اندر توڑ دیا۔ثاقب الغنی 2 ستمبر 1999 کو موتیہاری میں پیدا ہوئے۔ 26 سالہ ثاقب الغنی بہار کرکٹ میں مستقل کارکردگی کا مظاہرہ کرتے رہے ہیں۔اروناچل پردیش کے خلاف محض 32 گیندوں پر تیز ترین سنچری داغنے والے ثاقب الغنی کوئی اتفاقی نام نہیں ہیں، بلکہ وہ گزشتہ کئی برسوں سے بہار کی کرکٹ ٹیم کا ایک مضبوط ستون رہے ہیں۔ ان کی حالیہ تاریخی کارکردگی ان کی برسوں کی محنت اور مسلسل فارم کا نتیجہ ہے۔ثاقب الغنی نے اپنے پیشہ ورانہ کرکٹ (لسٹ-اے) کا آغاز 7 اکتوبر 2019 کو وجے ہزارے ٹرافی کے دوران کیا تھا۔ تب سے اب تک وہ مسلسل تین چار سیزن سے بہار کی ٹیم کا لازمی حصہ بنے ہوئے ہیں۔ انہوں نے گھریلو کرکٹ کے تمام فارمیٹس میں اپنی صلاحیتوں کا لوہا منوایا ہے۔رنجی ٹرافی (فرسٹ کلاس) کے طویل فارمیٹ میں رنز کے انبار لگا کر توجہ حاصل کی۔سید مشتاق علی ٹرافی (ٹی 20) میں اپنی جارحانہ بیٹنگ کی بدولت حال ہی میں ٹیم کے نائب کپتان (وائس کیپٹن) مقرر کیے گئے۔وجے ہزارے ٹرافی (ون ڈے) میں انہوں نے نہ صرف کپتانی کی بلکہ ہندوستان کی تیز ترین سنچری کا ریکارڈ بنا کر اپنا نام تاریخ میں درج کرا لیا۔ثاقب الغنی کی قیادت اور بیٹنگ میں پختگی کو دیکھتے ہوئے بہار کرکٹ ایسوسی ایشن نے ان پر بھرپور اعتماد ظاہر کیا ہے۔ گزشتہ چند سیزنز میں ان کی کارکردگی میں غیر معمولی تسلسل دیکھا گیا ہے، جس کی وجہ سے وہ اب ڈومیسٹک کرکٹ کے خطرناک ترین بلے بازوں میں شمار کیے جا رہے ہیں۔ماہرین کا کہنا ہے کہ جس طرح ثاقب الغنی نے 2019 میں ڈیبیو کے بعد سے خود کو نکھارا ہے، وہ دن دور نہیں جب وہ ہندوستانی قومی ٹیم کے دروازے پر دستک دیتے نظر آئیں گے۔انہوں نے اپنی کرکٹ کی بنیادی تعلیم مقامی اکیڈمی سے حاصل کی، جہاں ان کی تکنیک کو نکھارا گیا۔ثاقب الغنی کے نام صرف یہ حالیہ ریکارڈ ہی نہیں، بلکہ ان کا پورا کیریئر حیرت انگیز رہا ہے۔ ثاقب الغنی دنیا کے پہلے بلے باز ہیں جنہوں نے اپنے پہلے فرسٹ کلاس (رنجی ٹرافی) میچ میں ٹرپل سنچری (341 رنز) اسکور کی تھی۔ وجے ہزارے ٹرافی میں 32 گیندوں پر سنچری بنا کر انمول پریت سنگھ (35 گیندیں) کا ریکارڈ توڑ دیا۔ وہ نہ صرف ایک جارح مزاج دائیں ہاتھ کے بلے باز ہیں بلکہ دائیں ہاتھ سے میڈیم رفتار گیند بازی بھی کرتے ہیں۔ وہ انڈر 19 ورلڈ کپ میں ہندوستان کی نمائندگی کر کے اپنی صلاحیتوں کا لوہا منوا چکے ہیں۔ انہوں نے 7 اکتوبر 2019 کو اپنا لسٹ-اے ڈیبیو کیا تھا اور تب سے وہ مسلسل رنجی ٹرافی، سید مشتاق علی اور وجے ہزارے ٹرافی میں بہار کی نمائندگی کر رہے ہیں۔نوجوان اوپنر وئبھو سوریہ ونشی نے اروناچل پردیش کے خلاف اننگز کا آغاز کرتے ہوئے 36 گیندوں پر سنچری بنائی۔ وہ لسٹ-اے کرکٹ میں سنچری بنانے والے دنیا کے سب سے کم عمر کھلاڑی بن گئے۔ انہوں نے 84 گیندوں پر 190 رنز کی اننگز کھیل کر ثابت کر دیا کہ وہ مستقبل کے سپر اسٹار ہیں۔بہار کی ٹیم نے اس میچ میں مقررہ 50 اوورز میں 6 وکٹوں پر 574 رنز بنا کر لسٹ-اے کرکٹ کی تاریخ کا سب سے بڑا ٹیم اسکور بنا دیا۔ اس سے قبل یہ ریکارڈ تمل ناڈو (506 رنز) کے پاس تھا۔ادھر احمد آباد میں جھارکھنڈ کے کپتان ایشان کشن نے بھی ریکارڈ بک میں اپنا نام درج کرایا۔ کرناٹک کے مضبوط بولنگ اٹیک کے خلاف ایشان نے محض 33 گیندوں پر سنچری مکمل کی۔ 39 گیندوں پر 125 رنز (14 چھکے اور 7 چوکے)۔ وہ ثاقب الغنی کے بعد تیز ترین لسٹ-اے سنچری بنانے والے دوسرے ہندوستانی کھلاڑی بن گئے۔
ہندوستان کے تیز ترین لسٹ-اے سنچری میکرز
ثاقب الغنی (بہار): 32 گیندیں
ایشان کشن (جھارکھنڈ): 33 گیندیں
انمول پریت سنگھ (پنجاب): 35 گیندیں
وئبھو سوریہ ونشی (بہار): 36 گیندیں
