سیف انڈر19 ۔ ہندوستان کی نظریں فائنل پر؛ سیمی فائنل میں بھوٹان سے مقابلہ

مالے (مالدیپ)، 31 مارچ (یو این آئی): دفاعی چیمپئن ہندوستان بدھ کے روز یہاں نیشنل اسٹیڈیم میں سیف (ایس اے ایف ایف) انڈر 20 چیمپئن شپ کے سیمی فائنل میں بھوٹان کے مدمقابل ہوگا، جہاں اس کی نظریں فائنل میں جگہ بنانے پر ہوں گی۔ہندوستانی ٹیم گروپ بی میں پاکستان کو 0-3 سے شکست دینے اور بنگلہ دیش کے خلاف 1-1 سے ڈرا کھیلنے کے بعد گروپ ٹاپ کر کے سیمی فائنل میں پہنچی ہے۔ ٹیم نے مشکل لمحات میں بہترین نظم و ضبط اور صبر کا مظاہرہ کیا ہے۔ ہندوستانی ہیڈ کوچ مہیش گولی نے کھلاڑیوں کی کارکردگی اور ذہنیت کی تعریف کرتے ہوئے کہا، “لڑکوں نے دباؤ کو اچھی طرح سنبھالا ہے اور وہ اپنا 100 فیصد دے رہے ہیں۔ مجھے ان کی اب تک کی کارکردگی پر فخر ہے۔” تاہم، انہوں نے خبردار کیا کہ ناک آؤٹ مرحلے میں زیادہ توجہ کی ضرورت ہوگی۔ انہوں نے مزید کہا، “کچھ بھی آسان نہیں ہے۔ ہم نے گول کرنے کے مواقع پیدا کیے ہیں، اب ہمیں انہیں بہتر طریقے سے استعمال کرنا ہوگا اور دفاع کے دوران زیادہ چوکس رہنا ہوگا۔”دوسری جانب، بھوٹان کی ٹیم گروپ اے میں نیپال سے ہارنے اور مالدیپ کے خلاف ڈرا کے بعد سری لنکا کو آخری لمحات میں 1-0 سے ہرا کر سیمی فائنل میں پہنچی ہے۔ بھوٹان کا آخری وقت تک لڑنے کا جذبہ انہیں ایک خطرناک حریف بناتا ہے۔ میچ میں اصل مقابلہ فارورڈز کے درمیان متوقع ہے۔ ہندوستان کے وشال یادو اور اومانگ ڈوڈم دو دو گول کر چکے ہیں، جبکہ بھوٹان کے ڈھینڈوپ گیلٹسن بھی دو گول کے ساتھ اہم خطرہ ثابت ہو سکتے ہیں۔ واضح رہے کہ اس میچ میں اضافی وقت نہیں ہوگا اور مقررہ وقت کے بعد مقابلہ برابر رہنے کی صورت میں فیصلہ براہِ راست پنالٹی شوٹ آؤٹ پر ہوگا۔ یہ میچ ہندوستانی وقت کے مطابق رات 9بجے شروع ہوگا اور اسے یوٹیوب چینل ‘اسپورٹس ورکس پر براہِ راست دیکھا جا سکے گا۔ دوسرا سیمی فائنل نیپال اور بنگلہ دیش کے درمیان کھیلا جائے گا۔