نیرج چوپڑا نے جے ایس ڈبلیو اسپورٹس سے 10 سالہ رشتہ توڑا، ذاتی مینجمنٹ فرم کا آغاز

ممبئی،5 جنوری (یو این آئی ) ہندوستانی جیولن تھرو اسٹاراور اولمپک گولڈ میڈلسٹ نیرج چوپڑا اور جے ایس ڈبلیو اسپورٹس نے 10 سالہ کامیاب شراکت داری کے بعد باضابطہ طور پر راہیں جدا کرنے کا اعلان کر دیا ہے۔ نیرج اب اپنی ذاتی ایتھلیٹ مینجمنٹ فرم ’ویل اسپورٹس‘(Vale Sports) شروع کرنے جا رہے ہیں۔نیرج چوپڑا اور جے ایس ڈبلیو اسپورٹس کا ساتھ 2016 میں شروع ہوا تھا، جو ہندوستانی کھیلوں کی تاریخ کی کامیاب ترین شراکت داریوں میں سے ایک ثابت ہوا۔ اس دہائی کے دوران نیرج نے ٹوکیو اولمپکس 2020 میں ٹریک اینڈ فیلڈ میں ہندوستان کے لیے پہلا اولمپک گولڈ میڈل جیتا۔ورلڈ چیمپئن شپ 2023 میں طلائی تمغہ اپنے نام کیا۔پیرس اولمپکس 2024 میں چاندی کا تمغہ جیت کر اپنی برتری برقرار رکھی۔اپنے فیصلے پر روشنی ڈالتے ہوئے نیرج چوپڑا نے کہا”گزشتہ 10 سال ترقی، بھروسے اور کامیابیوں سے بھرپور رہے ہیں۔ میرے کیریئر کی تعمیر میں جے ایس ڈبلیو اسپورٹس کا کلیدی کردار رہا ہے اور میں ان کے تعاون کا ہمیشہ مشکور رہوں گا۔ اب میں اپنے سفر کے اگلے مرحلے میں انہی اصولوں کو ساتھ لے کر اپنی نئی فرم کا آغاز کر رہا ہوں۔جے ایس ڈبلیو اسپورٹس کے سی ای او دیویانشو سنگھ نے نیرج کے لیے نیک تمناؤں کا اظہار کرتے ہوئے کہا کہ نیرج کے ساتھ کام کرنا ایک ناقابل فراموش تجربہ تھا ۔نیرج چوپڑا کا اپنی مینجمنٹ فرم بنانا اس بات کی نشاندہی کرتا ہے کہ وہ اب بطور ایتھلیٹ نہ صرف میدان میں بلکہ کاروباری دنیا میں بھی خود مختار ہونا چاہتے ہیں۔