جیتنے والی ٹیم 3 جون کو ٹرافی کیلئے بنگلورو سے کریگی مقابلہ
احمدآباد، 31 مئی (یواین آئی) نریندر مودی اسٹیڈیم میں اتوار کے روز پنجاب کنگز اور ممبئی انڈینز ایک لاکھ سے زائد ناظرین کے سامنے انڈین پریمیئر لیگ (آئی پی ایل) 2025 کے فائنل میں جگہ بنانے کے لیے اپنی پوری طاقت جھونک دیں گے۔ دونوں ٹیموں کے درمیان کوالیفائر 2 کا سنسنی خیز مقابلہ شام ساڑھے سات بجے سے کھیلا جائے گا۔پانچ بار کی آئی پی ایل چیمپئن ممبئی کو موجودہ سیزن میں رفتار پکڑنے میں وقت لگا، لیکن بیٹنگ کی گہرائی اور جسپریت بمراہ کی قیادت میں گیند بازوں کی شاندار کارکردگی نے ٹیم کو چھٹے ٹائٹل کے قریب لا کھڑا کیا ہے۔بمراہ 36.6 کی شاندار ایکانومی کے ساتھ 18 وکٹیں لے کر عمدہ فارم میں ہیں، اور ان کی یہ طاقت اتوار کی رات کوالیفائر 2 میں فرق پیدا کر سکتی ہے۔ ممبئی نے ایلیمینیٹر میں گجرات ٹائٹنز پر 20 رنز کی شاندار فتح کے بعد اس میچ میں برتری حاصل کی ہوئی ہے۔ ہاردک پانڈیا کی قیادت میں موجودہ یونٹ کی بیٹنگ لائن اپ شاندار ہے۔ روہت شرما نے صحیح وقت پر فارم حاصل کی اور 50 گیندوں پر 81 رنز بنائے، جبکہ ول جیکس کے متبادل کے طور پر آنے والے جونی بیئراسٹو نے 22 گیندوں پر 47 رنز بنا کر شروعات میں ہی رفتار پکڑ لی۔ اس دوران سوریہ کمار یادو نے 83.167 کے شاندار اسٹرائیک ریٹ سے 673 رنز بنا ئے۔مڈل آرڈر میں تلک ورما، ہاردک، اور نمن دھیر مضبوطی فراہم کرتے ہیں، جبکہ دیپک چاہر گیند سے ابتدائی برتری حاصل کرنے کے لیے امپیکٹ پلیئر کے طور پر آ سکتے ہیں۔ بمراہ کی درست گیند بازی اور نئی گیند سے ٹرینٹ بولٹ کی سوئنگ ممبئی کی طاقت بنی ہوئی ہے۔ تاہم، ممبئی اپنے چوتھے گیند بازی آپشن کے حوالے سے محتاط رہے گی، کیونکہ پچھلے میچ میں رچرڈ گلیسن نے مایوس کیا تھا۔دوسری جانب، پنجاب کی ٹیم نئے زخموں سے نکل رہی ہے۔ مسلسل اچھے پرفارمنس کے بعد کوالیفائر 1 میں رائل چیلنجرز بنگلور (آر سی بی) کے خلاف ان کی ہار چونکا دینے والی تھی۔ تاہم، پچھلی ہار کو بھلا کر پنجاب کو کل اس میدان میں اترنا ہوگا جہاں پلے آف کا تجربہ نہ ہونا اور اسکور بورڈ کا دباؤ ٹیموں کو مکمل طور پر مشکل میں پھنسا سکتا ہے۔ پنجاب کے پاس میچ جیتنے والے کھلاڑیوں کی کمی نہیں ہے۔ پربھسمرن سنگھ (517) اور پریانش آریہ (431) نے لیگ کی سب سے سنسنی خیز نوجوان اوپننگ جوڑیوں میں سے ایک بنائی ہے، جبکہ کپتان شریس ایئر نے مڈل آرڈر میں 516 رنز بنا کر اپنی خاص شناخت بنائی ہے۔ تاہم، انہیں اور بھی بہت کچھ درکار ہوگا۔ جوش انگلس، مارکس اسٹوئنس، اور ششانک سنگھ کو موقع کا فائدہ اٹھانا ہوگا۔لیگ مرحلے میں ایم آئی کے خلاف انگلس کی 73 رنز کی دھماکہ خیز اننگز سب کو یاد ہوگی۔ اب اسے دہرانا سب سے زیادہ اہمیت رکھتا ہے۔ ارشدیپ سنگھ کی قیادت میں پنجاب کے گیند باز مخالف ٹیم کو کم اسکور پر روکنے کی پوری کوشش کریں گے۔ کائل جیمیسن نے پچھلے میچ میں شاندار کارکردگی دکھائی تھی، لیکن یوجیندر چہل کی غیر موجودگی اب بھی محسوس ہورہی ہے۔ اگر ہرپریت برار اور عظمت اللہ عمرزئی ڈٹ کر مقابلہ کریں تو پنجاب ایک بار پھر اپ سیٹ کر سکتا ہے۔
