محمد نواز کی ہیٹ ٹرک، پاکستان نے تین ملکی ٹی -20 سیریز جیت لی

شارجہ،8 ستمبر(یو این آئی )شارجہ میں کھیلے گئے تین ملکی ٹی 20 فائنل میں پاکستان نے شاندار کارکردگی کا مظاہرہ کرتے ہوئے افغانستان کو 75 رنزکے واضح فرق سے شکست دے دی اور ٹورنامنٹ کا چیمپئن بن گیا۔ پاکستان نے پہلے بیٹنگ کرتے ہوئے 20 اوورز میں 8 وکٹوں کے نقصان پر 141 رنزاسکور کیے۔ ٹاپ آرڈر کے کھلاڑی ناکام ہونے کے باوجود مڈل آرڈر نے ذمہ داری سے کھیل کر ٹیم کو قابلِ دفاع اسکور تک پہنچایا۔ جواب میں افغان ٹیم ہدف کا تعاقب کرنے میں مکمل طور پر ناکام رہی۔ محمد نوازنے تباہ کن بولنگ کا مظاہرہ کرتے ہوئے افغان بیٹنگ لائن کو بکھیر دیا۔ نواز نے یادگار ہیٹ ٹرک سمیت 4 اوورز میں 5 وکٹیں حاصل کیں اور صرف 19 رنز دے کر میچ کا پانسہ پاکستان کے حق میں پلٹ دیا۔ افغانستان کی پوری ٹیم صرف66 رنز پر آؤٹ ہوگئی۔ محمد نواز کی شاندار آل راؤنڈ پرفارمنس کے باعث انہیں میچ کا بہترین کھلاڑی قرار دیا گیا۔پاکستانی ٹیم کی اوپننگ کا آغاز اچھا نہ رہا اور صاحبزادہ فرحان صفر کے اسکور پر آؤٹ ہوکر پویلین لوٹے۔ بعد ازاں 49 کے مجموعی اسکور پر صائم ایوب 17 رنز کی اننگز کھیل کر آؤٹ ہوئے۔تیسرے آؤٹ ہونے والے کھلاڑی فخر زمان تھے جنہیں راشد خان نے ہدف بنایا اور 27 کے انفرادی جبکہ 51 کے مجموعی اسکور پر پویلین بھیجا۔ اس کے بعد حسن نواز اور کپتان سلمان آغا نے ذمہ دارانہ بیٹنگ کرتے ہوئے اسکور کو 69 تک پہنچایا تو راشد خان نے حسن نواز کو 15 کے انفرادی اسکور پر چلتا کردیا۔ پھر 72 کے مجموعی اسکور پر نور احمد نے وکٹ کیپر محمد حارث کو کلین بولڈ کر کے پویلین واپس بھیجا۔ یوں پاکستان کی آدھی ٹیم 72 رنز پر پویلین واپس لوٹ گئی۔ سلمان آغا 112، فہیم اشرف 130 اور محمد نواز 136 کے مجموعی اسکور پر آؤٹ ہوئے۔ پاکستان نے مقررہ 20 اوورز میں 8 وکٹوں کے نقصان پر 141 رنز بنائے۔ فخر زمان 27 رنز کے ساتھ نمایاں بلے باز رہے۔افغانستان اننگزہدف کے تعاقب میں افغانستان نے بیٹنگ کا آغاز کیا تو 7 کے مجموعی اسکور پر پہلی وکٹ گری، پھر 28 پر دوسرا کھلاڑی آؤٹ ہوا۔ اس کے بعد محمد نواز نے لگاتا 2 وکٹیں لیں اور 29 پر چار کھلاڑی آؤٹ ہوئے، پھر 32 کے مجموعی اسکور زردان بھی نواز کا شکار بنے۔ اس کے بعد 32 کے ہی اسکور پر کریم جنت اور پھر 46 پر محمد نبی آؤٹ ہوئے۔ بعد ازاں 55 کے مجموعی اسکور پر راشد خان، جبکہ 57 پر نور احمد اور 66 پر غضنفر پویلین لوٹے۔ محمد نواز نے شاندار بولنگ کا مظاہرہ کیا اور چاراوورز میں سے ایک میڈان کروا کے 19 رنز دے کر 5 وکٹیں حاصل کیں۔