ہندوستان پر دباؤ ڈال کر حیران کن نتیجہ دینے کی کوشش کریں گے: مچل سینٹنر

دبئی، 7 مارچ (یو این آئی)نیوزی لینڈ کے کپتان مچل سینٹنر نے اتوار کے روز احمد آباد کے نریندر مودی اسٹیڈیم میں ہونے والے ٹی 20 ورلڈ کپ کے فائنل سے قبل ایک بڑا بیان دیا ہے۔ انہوں نے کہا کہ ان کی ٹیم ایک لاکھ سے زائد شائقین کی موجودگی میں ہندوستان کو شکست دے کر ‘اسپائلر‘ (کھیل بگاڑنے والے) کا کردار ادا کرنے سے پیچھے نہیں ہٹے گی۔سینٹنر نے ٹرافی جیتنے کے عزم کا اظہار کرتے ہوئے کہا:”مجھے ٹرافی جیت کر بہت خوشی ہوگی۔ ہم جانتے ہیں کہ ہم اس فائنل کے لیے فیورٹ نہیں ہیں، لیکن مجھے (ہندوستانیوں کے) چند دل توڑ کر ایک بار پھر ٹرافی اٹھانے میں کوئی اعتراض نہیں ہوگا۔”کیوی کپتان نے مزید کہا کہ ٹی 20 کرکٹ انتہائی غیر یقینی کھیل ہے۔ انہوں نے جنوبی افریقہ کی مثال دیتے ہوئے کہا کہ پروٹیز ٹیم پورے ٹورنامنٹ میں بہترین کھیلی لیکن ہمارے خلاف ایک غلطی انہیں باہر لے گئی۔ ان کا ماننا ہے کہ ہندوستان پر اپنے گھر میں مسلسل دوسرا ورلڈ کپ جیتنے کا زبردست دباؤ ہوگا اور اگر نیوزی لینڈ یہ دباؤ بڑھانے میں کامیاب رہا تو وہ کسی بھی بڑی ٹیم کو ہرا سکتے ہیں۔آل راؤنڈر گلین فلپس نے بھی فائنل کے حوالے سے اپنے جوش کا اظہار کیا۔ انہوں نے کہا، “ہمارے لیے یہ لمحہ بھرپور انداز میں کھیلنے اور لطف اٹھانے کا ہے۔ ہم ایک گروپ کے طور پر بہترین وقت گزارتے ہیں اور اپنے ملک کے لیے پوری کوشش کرتے ہیں۔ بھرے ہوئے اسٹیڈیم کا ماحول بھی شاندار ہوگا، چاہے شائقین ہماری حمایت کریں یا ہندوستان کی، یہ کرکٹ کے لیے بہترین بات ہے۔”واضح رہے کہ ہندوستان کی نظریں تیسرے ورلڈ کپ ٹائٹل اور مسلسل دوسری بار چیمپئن بننے پر ہیں، جبکہ نیوزی لینڈ اپنے پہلے ٹی 20 ورلڈ کپ خطاب کی تلاش میں ہے۔