جدید بھارت نیوز سروس
رانچی،23؍نومبر: جوش و خروش اور سنسنی جب اپنے عروج پر ہو تو سردیوں کی صبح بھی گرمجوشی کا احساس دلاتی ہے۔ ہلکی سردی کے موسم میں ایک طرف تھے تیز رفتار شارٹ کھیلنے والے ڈاکٹر شیران علی اور توحید اکرم کی جوڑی، اور دوسری طرف ان کے مقابل کھڑے تھے فنّی کھیل کے ماہر شمیم مجیبی اور ان کے نوجوان ساتھی نسیم اختر، جنہیں مولانا آزاد بیڈمنٹن ٹورنامنٹ اپنے نام کرنے کا سنہری موقع ملا تھا۔ لیکن اپنی طاقت اور بہترین شارٹس کے دم پر ڈاکٹر شیران علی اور توحید اکرم کی جوڑی نے ایک سنسنی خیز فائنل میں شمیم مجیبی اور نسیم اختر کو شکست دے کر ٹورنامنٹ جیت لیا۔سابق مرکزی وزیر سبودھ کانت سہائے کی موجودگی کھلاڑیوں کے حوصلے بلند کر رہی تھی۔
چیمپئن جوڑی کو ٹرافی پیش کرتے ہوئے سابق مرکزی وزیر نے کہا کہ ’’مارننگ گروپ‘‘ رانچی شہر کے لیے ایک مثال قائم کر رہا ہے، جہاں بچے، نوجوان، بڑے اور بزرگ ایک خوبصورت گلدستے کی مانند ہیں۔ یہاں معاشرے کے ہر طبقے کے لوگ موجود ہیں اور کھیل کی روح کے ذریعے صحت مند زندگی کی تحریک دی جا رہی ہے۔اسی دوران نائب چیمپئن شمیم مجیبی اور نسیم اختر کو ٹرافی پیش کرتے ہوئے جمعیت علماءِ ہند کے جھارکھنڈ صوبائی سیکریٹری حاجی شاہ عمر نے کہا کہ ’’مارننگ گروپ‘‘ کے سرپرستِ اعلیٰ حاجی حلیم الدین، صدر عقیل الرحمٰن، سرپرست سابق ایم ایل اے جئے پرکاش گپتا، سماجی کارکن وجے ساہو، مولانا تہذیب الحسن رضوی، اقبال انصاری وغیرہ جیسے لوگوں کی موجودگی ثابت کرتی ہے کہ یہ گروپ کھیل کی روح کے ساتھ معاشرے کے تمام طبقات کو جوڑ کر رکھتا ہے۔
اسٹیج کی نظامت کرتے ہوئے صدر عقیل الرحمٰن نے اعلان کیا کہ بہت جلد شبیر آزاد میموریل بیڈمنٹن ٹورنامنٹ منعقد کیا جائے گا۔ سرپرستِ اعلیٰ حاجی حلیم الدین نے کہا کہ کھیل میں حصہ لینے والوں میں نئی توانائی پیدا ہوتی ہے۔فائنل میچ کے ریفری نہال احمد نے اپنے معاون مستقیم عالم اور لائن مین نشاط انور، یونس خان، حسن سیفی اور محمد کمال کے ساتھ میچ کو کامیابی سے مکمل کرایا۔ ٹورنامنٹ کو کامیاب بنانے میں عبد الخالق ننھو، نفیس اختر، عبد المنان، سرفراز احمد پہاڑی ٹولہ اور دیگر حضرات کا اہم کردار رہا۔
