افتتاحی میچ میں کولہان کی شاندار جیت
کولہان نے چھوٹا ناگپور بلاسٹرز کو 8 وکٹوں سے دی شکست، ممتا پاسوان کی قاتلانہ گیند بازی اور درگا مرمو کی شاندار نصف سنچری
جدید بھارت نیوز سروس
رانچی، 3 جون:۔ جھارکھنڈ میں خواتین کی کرکٹ کے سب سے بڑے میلے ‘جھارکھنڈ ویمنز ٹی-20 لیگ ‘ کا رنگا رنگ اور پرجوش آغاز ہو گیا ہے۔ ٹورنامنٹ کے افتتاحی میچ سے قبل ایک شاندار ثقافتی پروگرام کا انعقاد کیا گیا، جس نے اسٹیڈیم میں موجود شائقین اور کھلاڑیوں کے جوش و خروش کو دوبالا کر دیا۔ اس کے بعد میدان پر شروع ہوئے کرکٹ کے سنسنی خیز مقابلے میں کولہان ڈائناموز کی ٹیم نے شاندار کارکردگی کا مظاہرہ کرتے ہوئے چھوٹا ناگپور بلاسٹرز کو 8 وکٹوں سے کراری شکست دے کر ٹورنامنٹ میں اپنی مہم کا دھماکے دار آغاز کیا۔میچ میں چھوٹا ناگپور بلاسٹرز کی ٹیم نے ٹاس جیت کر پہلے بلے بازی کرتے ہوئے مقررہ 20 اوورز میں 8 وکٹوں کے نقصان پر 107 رنز کا اسکور کھڑا کیا۔ ٹیم کی جانب سے پریا کماری نے سب سے زیادہ 29 رنز (32 گیندیں، 4 چوکے، 1 چھکا) بنائے۔ ان کے علاوہ رشمتی گڑیا نے 17، پریتی شرما نے 14 اور دیویانی پرساد نے ناٹ آؤٹ 13 رنز کا تعاون دیا۔ ٹیم کی کپتان ششی ماتھر صرف 10 رنز ہی بنا سکیں۔ کولہان ڈائناموز کی نپی تلی گیند بازی کے سامنے چھوٹا ناگپور کی بلے باز کھل کر رنز بنانے میں ناکام رہیں۔ کولہان کی جانب سے ممتا پاسوان نے تباہ کن گیند بازی کا مظاہرہ کرتے ہوئے اپنے کوٹے کے 4 اوورز میں محض 10 رنز دے کر 4 اہم وکٹیں حاصل کیں، جب کہ شفا حسن نے 2 کھلاڑیوں کو آؤٹ کیا۔جیت کیلئے ملے 108 رنز کے ہدف کو کولہان ڈائناموز کی ٹیم نے انتہائی آسانی سے 16.2 اوورز میں محض 2 وکٹیں گنوا کر حاصل کر لیا۔ کولہان کی اس یکطرفہ جیت کی اسٹار بلے باز درگا مرمو رہیں، جنہوں نے 54 گیندوں پر 7 چوکوں اور 1 چھکے کی مدد سے 56 رنز کی شاندار ناٹ آؤٹ نصف سنچری اننگز کھیلی۔ اوپنر آروشی گوئل نے بھی 26 رنز کا اہم تعاون پیش کیا۔ چھوٹا ناگپور بلاسٹرز کی طرف سے دیویانی پرساد ہی واحد گیند باز رہیں جنہیں 1 وکٹ حاصل ہو سکی۔ ممتا پاسوان کی عمدہ گیند بازی اور درگا مرمو کی بہترین نصف سنچری کی بدولت کولہان ڈائناموز نے پوائنٹس ٹیبل پر اپنے سفر کا آغاز جیت کے ساتھ کیا ہے۔ اس مقتدر افتتاحی تقریب اور میچ کے موقع پر جے ایس سی اے کے خزانچی امیتابھ گھوش، جے ایس سی اے کے سابق صدر سنجے سہائے، سابق نائب صدر ڈاکٹر نریندر سنہا، سابق جوائنٹ سکریٹری پی این سنگھ، جے ایس سی اے کی انتظامی کمیٹی کے اراکین مہیر پرتس ٹوپنو، سنجے جین، رمیش کمار، دھنباد ضلع کرکٹ ایسوسی ایشن کے صدر منوج کمار، رانچی ضلع کرکٹ ایسوسی ایشن کے سکریٹری شیلیندر کمار، کھونٹی ضلع کرکٹ ایسوسی ایشن کے سکریٹری اودھیش کشیپ کے ساتھ ساتھ جے ایس سی اے کے متعدد تاحیات اراکین بھی موجود تھے اور کھلاڑیوں کی حوصلہ افزائی کی۔
