سخت مقابلے کے درمیان ہندوستانی اسکیٹ نشانے باز مقابلےکیلئے تیار

ٹانگیئر (مراکش)، 26 مارچ (یو این آئی) آئی ایس ایس ایف شاٹ گن ورلڈ کپ ٹانگیئر کے تحت ہندوستانی اسکیٹ ٹیم 27 مارچ سے شروع ہونے والے مقابلوں میں شرکت کے لیے مکمل طور پر تیار ہے۔ 2026 سیزن کا یہ پہلا ٹورنامنٹ ‘کلب ٹانگیروآ دا تیر’، ٹانگیئر میں منعقد ہوگا، جہاں دنیا کے کئی نامور نشانے باز حصہ لے رہے ہیں۔مقابلے کے پہلے دن مردوں اور خواتین کے زمرے میں 75-75 ٹارگٹس ہوں گے، جس کے بعد 50 ٹارگٹس اور اتوار کو فائنل مقابلے کھیلے جائیں گے۔ یہ مقابلے ہندوستانی وقت کے مطابق دوپہر 1:30 بجے (مقامی وقت صبح 9 بجے) شروع ہوں گے۔ خواتین کا فائنل رات 8:30 بجے اور مردوں کا فائنل رات 10:00 بجے منعقد ہوگا۔ اس عالمی کپ میں اولمپک اور ورلڈ چیمپئنز کی موجودگی اسے انتہائی مسابقتی بناتی ہے۔ ہندوستان نے مردوں اور خواتین دونوں زمروں میں زیادہ سے زیادہ چھ چھ کھلاڑیوں کی انٹری دی ہے، جبکہ دو دو کھلاڑی رینکنگ پوائنٹس کے لیے حصہ لیں گے۔خواتین کے زمرے میں موجودہ اولمپک چیمپئن چلی کی فرانسسکا کروویٹو چادید، جو زچگی کی چھٹی کے بعد واپسی کر رہی ہیں، توجہ کا مرکز ہوں گی۔ ان کے علاوہ امریکہ کی ورلڈ چیمپئن سامنتھا سیمنٹن، اٹلی کی دو بار کی اولمپک اور ورلڈ چیمپئن ڈیانا باکوسی اور قازقستان کی اسم اورین بائے جیسی ٹاپ کھلاڑی بھی شامل ہیں۔