آرون جارج کی سنچری نے افغانستان کا غرور خاک میں ملا دیا، بھارت کا فائنل میں انگلینڈ سے ٹکراؤ
ہرارے،4؍فروری(ایجنسی): بھارتی انڈر-19 کرکٹ ٹیم نے اپنی روایتی بالادستی برقرار رکھتے ہوئے دسویں مرتبہ آئی سی سی انڈر-19 ورلڈ کپ کے فائنل میں جگہ بنا لی ہے۔ بدھ کے روز کھیلے گئے دوسرے سیمی فائنل میں بھارت نے افغانستان کو 7 وکٹوں سے شکست دے کر فائنل کا ٹکٹ حاصل کیا۔ اب 6 فروری کو ٹائٹل کے حصول کے لیے ٹیم انڈیا کا مقابلہ انگلینڈ سے ہوگا۔ہرارے اسپورٹس کلب میں کھیلے گئے اس اہم مقابلے میں افغانستان نے ٹاس جیت کر پہلے بیٹنگ کا فیصلہ کیا۔ افغانی بلے بازوں نے بھارتی بولرز کا ڈٹ کر مقابلہ کیا اور مقررہ 50 اوورز میں صرف 4 وکٹیں گنوا کر 310 رنز کا پہاڑ جیسا مجموعہ کھڑا کیا۔ افغانستان کی جانب سے دو شاندار سنچریاں دیکھنے کو ملیں؛ فیصل شینوزادہ نے 110 رنز کی باری کھیلی، جبکہ عزیر اللہ نیازی 101 رنز بنا کر ناٹ آؤٹ رہے۔ ان دونوں کی ذمہ دارانہ بیٹنگ نے ایسا محسوس کرایا کہ شاید بھارت کے لیے یہ ہدف عبور کرنا مشکل ہوگا۔ بھارت کی جانب سے دیپیش دیویندرن اور کنشک چوہان نے دو دو وکٹیں حاصل کیں۔311 رنز کے مشکل ہدف کے تعاقب میں بھارتی ٹیم نے غیر معمولی کارکردگی کا مظاہرہ کیا۔ اوپنر آرون جارج نے میچ کے آغاز سے ہی افغانی بولرز پر دباؤ بنائے رکھا اور 115 رنز کی شاندار سنچری اسکور کی۔ ان کا بھرپور ساتھ ویبھو سوریاونشی (68 رنز) اور کپتان آیوش مہاترے (62 رنز) نے دیا، جنہوں نے نصف سنچریاں بنا کر جیت کی راہ ہموار کی۔ بھارت نے یہ ہدف محض 41.1 اوورز میں 3 وکٹیں کھو کر حاصل کر لیا۔اس جیت کے ساتھ ہی بھارت نے انڈر-19 ورلڈ کپ کی تاریخ کا سب سے بڑا ‘رن چیز (ہدف کا تعاقب) کرنے کا ریکارڈ اپنے نام کر لیا۔ مزید برآں، یہ یوتھ ون ڈے کرکٹ کی تاریخ میں کسی بھی ٹیم کی جانب سے حاصل کیا گیا سب سے بڑا ہدف ہے۔اس میچ میں مجموعی طور پر 620 رنز بنے، جو بھارت اور افغانستان کے درمیان یوتھ ون ڈے کی تاریخ میں کسی ایک میچ میں بننے والے سب سے زیادہ رنز ہیں۔ اس سے قبل یہ ریکارڈ 521 رنز کا تھا جو پانچ سال پہلے 2021 میں دبئی کے میدان پر بنا تھا۔ افغانستان کے لیے یہ بات کافی مایوس کن رہی کہ ان کی ٹیم کی جانب سے دو سنچریاں بننے کے باوجود وہ بھارت کو روکنے میں ناکام رہے۔ فیصل اور عزیر اللہ کی محنت پر آرون جارج کی سنچری اور بھارتی بلے بازوں کے جارحانہ انداز نے پانی پھیر دیا۔بھارتی ٹیم اب مکمل اعتماد کے ساتھ انگلینڈ کے خلاف فائنل میں اترے گی، جہاں اس کی نظریں چھٹی بار عالمی چیمپئن بننے پر ہوں گی۔
