زویریو کو شکست دیکر پہلی بار آسٹریلین اوپن کے فائنل میں
میلبورن، 30 جنوری (یو این آئی) اسپین کے اسٹار ٹینس کھلاڑی کارلوس الکاراز نے جمعہ کو ایک سنسنی خیز اور طویل مقابلے میں جرمنی کے الیگزینڈر زویریو کو شکست دے کر پہلی مرتبہ آسٹریلین اوپن کے فائنل میں رسائی حاصل کر لی۔ شدید جسمانی مشکلات اور شکست کے دہانے تک پہنچنے کے باوجود الکاراز نے غیر معمولی حوصلے اور عزم کا مظاہرہ کرتے ہوئے یادگار فتح حاصل کی۔اے ٹی پی رینکنگ کے عالمی نمبر ایک کھلاڑی کارلوس الکاراز نے عالمی نمبر تین الیگزینڈر زویریو کو پانچ سیٹوں پر مشتمل تاریخی سیمی فائنل میں 6-4، 7-6(5)، 6-7(3)، 6-7(4)، 7-5 سے شکست دی۔ راڈ لیور ایرینا میں کھیلا گیا یہ مقابلہ 5 گھنٹے اور 27 منٹ تک جاری رہا، جو آسٹریلین اوپن کی تاریخ کا طویل ترین سیمی فائنل ثابت ہوا۔میچ کے دوران تیسرے سیٹ کے اختتام پر الکاراز کو دائیں اوپری ٹانگ میں تکلیف کا سامنا کرنا پڑا، جس کے باعث انہیں فزیوتھراپسٹ سے دو مرتبہ علاج کروانا پڑا۔ اس کے باوجود ہسپانوی کھلاڑی نے فیصلہ کن پانچویں سیٹ میں 3-5 سے پیچھے ہونے کے بعد شاندار واپسی کرتے ہوئے میلبورن میں اپنے پہلے فائنل میں جگہ پکی کر لی۔میچ کے بعد کورٹ پر دیے گئے انٹرویو میں کارلوس الکاراز نے کہا:“سب سے اہم بات خود پر یقین رکھنا ہے۔ میں ہمیشہ یہی کہتا ہوں کہ چاہے حالات کتنے ہی مشکل کیوں نہ ہوں، خود پر اعتماد قائم رکھنا چاہیے۔ تیسرے سیٹ میں میں شدید مشکلات سے گزر رہا تھا۔ جسمانی اعتبار سے یہ میرے اب تک کے مختصر کیریئر کا سب سے چیلنجنگ مقابلہ تھا۔میں اس طرح کے حالات پہلے بھی دیکھ چکا ہوں اور مجھے معلوم تھا کہ مجھے کیا کرنا ہے۔ میں نے آخری پوائنٹ تک دل لگا کر مقابلہ کیا۔ مجھے یقین تھا کہ مواقع ضرور آئیں گے، اور جس طرح میں نے پانچویں سیٹ میں واپسی کی، اس پر مجھے اپنے آپ پر بے حد فخر ہے۔”اس کامیابی کے ساتھ کارلوس الکاراز کیریئر گرینڈ سلیم مکمل کرنے سے محض ایک فتح کی دوری پر ہیں، یعنی چاروں گرینڈ سلیم ٹورنامنٹس میں سنگلز ٹائٹل جیتنے والے سب سے کم عمر کھلاڑی بن سکتے ہیں۔ اگر وہ اتوار کے فائنل میں یانک سینر یا نوواک جوکووچ کو شکست دے دیتے ہیں تو وہ یہ اعزاز اپنے ہم وطن رافیل نڈال سے چھین لیں گے۔تاہم، تاریخ رقم کرنے کی راہ میں الکاراز کو ایک اور سخت امتحان کا سامنا ہے۔ عالمی نمبر دو یانک سینر میلبورن پارک میں مسلسل دو مرتبہ دفاعی چیمپئن رہ چکے ہیں، جبکہ نوواک جوکووچ ریکارڈ دس بار آسٹریلین اوپن کے فاتح بن چکے ہیں۔قابلِ ذکر بات یہ ہے کہ الکاراز نے ٹورنامنٹ کے ابتدائی پانچ مقابلوں میں ایک بھی سیٹ نہیں ہارا تھا۔ زویریو کے خلاف بھی انہوں نے ابتدائی دو سیٹ جیت کر برتری حاصل کر لی تھی۔ خاص طور پر دوسرے سیٹ میں 2-5 سے پیچھے ہونے کے باوجود شاندار واپسی ان کے غیر معمولی اعتماد کا مظہر رہی۔تیسرے سیٹ میں 4-4 اور 15/15 کے اسکور پر مقابلے نے نیا رخ اختیار کیا، جب سرو کرتے ہوئے الکاراز کے دائیں پیر کے اوپری حصے میں چوٹ لگی۔
علاج کے باوجود زویریو نے میچ میں بھرپور واپسی کی اور مقابلہ فیصلہ کن سیٹ تک لے گئے۔پانچویں سیٹ کے آغاز میں زویریو نے الکاراز کی سروس توڑ کر سبقت حاصل کی اور 5-4 پر میچ جیتنے کے لیے سرو کرنے لگے، تاہم اسی لمحے الکاراز نے ناقابلِ یقین حوصلہ دکھاتے ہوئے مسلسل چار گیمز جیت لیے اور میچ پوائنٹ پر الکاراز نے تاریخی فتح اپنے نام کر لی۔
