نریندر مودی اسٹیڈیم میں گجرات ٹائٹنز اور پنجاب کنگز آمنے سامنےآج

گجرات، 24 مارچ (یواین آئی) بلے بازوں کے لیے سازگار اور زیادہ اسکور والی احمد آباد کے نریندر مودی اسٹیڈیم کی پچ پر انڈین پریمیئر لیگ (آئی پی ایل) 2025 کے پانچویں میچ میں گجرات ٹائٹنز (جی ٹی) اور پنجاب کنگز (پی بی کے ایس) کے درمیان شائقین کوایک چیلنجنگ مقابلہ دیکھنے کو ملے گا۔اگر دونوں ٹیموں کے درمیان پچھلے مقابلوں کے اعداد و شمار پر نظر ڈالیں تو یہ ہمیشہ دلچسپ رہا ہے۔ 2022 سے 2024 تک گجرات ٹائٹنز اور پنجاب کنگز کے درمیان پانچ میچوں میں سے چار مقابلے آخری اوور تک گئے ہیں، جو اس بات کا ثبوت ہے کہ دونوں ٹیموں کے درمیان مقابلہ کس قدر سخت ہوتا ہے۔ ان پانچ میچوں میں گجرات نے تین جبکہ پنجاب نے دو میچ جیتے ہیں۔بلے بازی کے لحاظ سے دیکھا جائے تو گلين میکسویل مڈل اوورز میں جارحانہ بلے بازی کے لیے جانے جاتے ہیں۔ چھکے لگانے کے معاملے میں بھی میکسویل سب سے آگے ہیں۔ دونوں ٹیموں میں گلين میکسویل (161 چھکے)، جوس بٹلر (160 چھکے) اور مارکس اسٹوئنس (91 چھکے) نمایاں ہیں۔ اس کے علاوہ پنجاب کی ٹیم میں ششانک سنگھ اور پربھسمرن سنگھ جیسے ابھرتے ہوئے نوجوان کھلاڑی شامل ہیں، جو ہر تیسری یا چوتھی گیند پر کم از کم ایک باؤنڈری لگانے کی صلاحیت رکھتے ہیں۔ پنجاب کے پربھسمرن سنگھ نے اب تک 10 میچوں میں 154.72 کے اسٹرائیک ریٹ سے 229 رنز بنائے ہیں۔دوسری جانب، گجرات کی ٹیم کو اس سیزن میں شبھمن گل اور جوس بٹلر کی صورت میں نئی اوپننگ جوڑی ملی ہے، جو پاور پلے میں تیزی سے رنز بنانے کے لیے جانے جاتے ہیں۔ گل نے 10 میچوں میں 147.7 کے اسٹرائیک ریٹ سے 383 رنز بنائے ہیں۔اگر گیند بازی کی بات کریں تو آئی پی ایل 2023 سے اب تک سب سے زیادہ وکٹ لینے والے گیند بازوں کی فہرست میں ورون چکرورتی (41 وکٹ) پہلے نمبر پر، یوزویندر چہل (39 وکٹ) دوسرے اور راشد خان (37 وکٹ) تیسرے نمبر پر ہیں۔ یہ تینوں گیند باز اپنی ٹیموں کے لیے نہایت اہم ہیں اور اپنے دم پر میچ کا رخ پلٹنے کی صلاحیت رکھتے ہیں۔گجرات ٹائٹنز کے لیے راشد خان اپنی نپی تلی گیند بازی کے لیے مشہور ہیں۔ راشد نے میکسویل کے خلاف 15 ٹی-20 اننگز میں صرف 117 کے اسٹرائیک ریٹ سے رنز دیے ہیں اور انہیں تین مرتبہ آؤٹ بھی کر چکے ہیں۔ اگر راشد اپنی اس کارکردگی کو دہرائیں گے تو مڈل اوورز میں میکسویل کے لیے مشکلات پیدا کر سکتے ہیں۔پنجاب کنگز کے تیز گیند باز ارشدیپ سنگھ بھی اہم کردار ادا کر سکتے ہیں۔ ارشدیپ کے خلاف بٹلر اور گل کا اسٹرائیک ریٹ بالترتیب 150 اور 126 ہے، تاہم وہ ٹی-20 میچوں میں ان دونوں بلے بازوں کو صرف ایک بار آؤٹ کر سکے ہیں۔ ارشدیپ اس بار اپنی کارکردگی کو بہتر بنانے کے ارادے سے میدان میں اتریں گے۔