فیفا ورلڈ کپ 2026: جرمنی اور نیدرلینڈز کا سفر تمام

پیراگوئے اور مراکش نے ’شوٹ آؤٹ‘ سے لکھا فتح کا نیا باب

فاکسبورو / میکسیکو سٹی، 30 جون: فٹ بال کے عالمی میلے ’فیفا ورلڈ کپ 2026‘ کے ناک آؤٹ مرحلے میں منگل کا دن تاریخ کے اوراق میں ہمیشہ کیلئےدرج ہو گیا ہے۔ فٹ بال کی دنیا کی دو بڑی طاقتوں، چار بار کی عالمی چیمپئن جرمنی اور نیدرلینڈز (ہالینڈ) کو ٹورنامنٹ سے باہر کا راستہ دیکھنا پڑا۔ یہ ورلڈ کپ اب تک کے سب سے بڑے اپ سیٹس کا گواہ بن چکا ہے، جہاں پیراگوئے اور مراکش نے اپنی شاندار حکمتِ عملی اور اعصابی مضبوطی کے بل بوتے پر آخری-16 (پری کوارٹر فائنل) میں اپنی جگہ یقینی بنا لی ہے۔
پیراگوئے کا جرمنی پر تاریخی وار
فاکسبورو کے میدان میں کھیلے گئے میچ میں پیراگوئے نے چار بار کی ورلڈ چیمپئن جرمنی کو شکست دے کر پوری دنیا کو حیران کر دیا۔ میچ کے آغاز سے ہی جرمن کوچ جولین ناگیلسمین نے جارحانہ حکمتِ عملی اپنائی اور ڈینیز اونڈاو کو پہلی بار شروعاتی الیون میں شامل کیا۔ جرمنی نے گیند پر اپنا کنٹرول تو برقرار رکھا، لیکن پیراگوئے کی دفاعی دیوار کو توڑنے میں ناکام رہے۔میچ کا پہلا اہم موڑ 35ویں منٹ میں آیا، جب میگوئل المیرون کی واپسی کے ساتھ پیراگوئے نے ایک زبردست جوابی حملہ کیا، جسے جولیواینسیسو نے ہیڈر کے ذریعے گول میں بدل کر ٹیم کو 0-1 کی برتری دلا دی۔ ورلڈ کپ کے ناک آؤٹ مرحلے میں پیراگوئے کا یہ پہلا گول تھا۔ دوسرے ہاف میں جرمنی نے 54ویں منٹ میں کائی ہیورٹز کے گول سے اسکور 1-1 برابر کیا۔ اضافی وقت میں جرمنی نے جوناتھن تاہ کے ذریعے گول کیا، لیکن وی اے آر (VAR) ریویو کے بعد اسے گول کیپر پر فاؤل قرار دے کر منسوخ کر دیا گیا۔فیصلہ پنالٹی شوٹ آؤٹ پر ہوا، جہاں جرمنی کے کائی ہیورٹز، نک وولٹیمیڈ اور جوناتھن تاہ اپنی کوشش میں ناکام رہے۔ پیراگوئے کے جوسے کینالے نے فیصلہ کن پنالٹی کو گول میں بدل کر 3-4 سے تاریخی جیت درج کرائی۔ اب پیراگوئے کا مقابلہ فرانس اور سویڈن کے درمیان ہونے والے میچ کی فاتح ٹیم سے ہوگا۔
مراکش کا طلسماتی کھیل، نیدرلینڈز کا سفر تمام
دوسری جانب میکسیکو سٹی میں کھیلے گئے ایک اور سنسنی خیز مقابلے میں مراکش نے نیدرلینڈز کو پنالٹی شوٹ آؤٹ میں 2-3 سے شکست دے کر اپنی دھاک بٹھا دی۔ میچ کے دوران نیدرلینڈز کے کوڈی گاکپو نے دوسرے ہاف میں گول کر کے ٹیم کو 0-1 کی برتری دلائی۔ یہ گول ان کے لیے انتہائی جذباتی تھا، کیونکہ کچھ دن قبل ہی ان کے ساتھی کے بچے کی موت کا اعلان ہوا تھا۔ گاکپو جذباتی ہو کر میدان میں رو پڑے، لیکن مراکش نے ہمت نہیں ہاری۔
انجری ٹائم کے پہلے ہی منٹ میں شمس الدین طالبی کے کراس پر عیسی ڈیوپ نے ہیڈر کے ذریعے گول کر کے اسکور 1-1 کر دیا اور میچ کو اضافی وقت میں دھکیل دیا۔ اضافی وقت میں دونوں ٹیموں کو گول کرنے کے سنہری مواقع ملے، لیکن ڈچ گول کیپر بارٹ وربروگن اور مراکش کے گول کیپر یاسین بونو نے اپنی ٹیموں کو مزید گول کرنے سے روکے رکھا۔پنالٹی شوٹ آؤٹ میں مراکش کے گول کیپر یاسین بونو ایک آہنی دیوار بن کر سامنے آئے۔ انہوں نے نیدرلینڈز کی چوتھی پنالٹی کو روک کر مراکش کی فتح کی راہ ہموار کی۔ اس کے بعد اسماعیل صیباری نے فیصلہ کن پنالٹی کو گول میں بدل کر مراکش کو یادگار جیت دلائی۔ اس جیت کے ساتھ ہی مراکش نے راؤنڈ آف 16 میں اپنی جگہ بنا لی ہے، جہاں ان کا مقابلہ اب کینیڈا سے ہوگا۔
ماہرین کی رائے
فٹ بال کے مبصرین اس دن کو ورلڈ کپ 2026 کا سب سے بڑا موڑ قرار دے رہے ہیں۔ جرمنی اور نیدرلینڈز کا ایک ہی دن باہر ہو جانا یہ ثابت کرتا ہے کہ موجودہ دور میں فٹ بال کا توازن تیزی سے بدل رہا ہے۔ اب پیراگوئے اور مراکش جیسی ٹیمیں، جو کسی دور میں محض ایک چیلنج سمجھی جاتی تھیں، اب ٹورنامنٹ کی مضبوط ترین ٹیموں کو شکست دے کر ٹائٹل کی دوڑ میں شامل ہو چکی ہیں۔ ان نتائج نے ورلڈ کپ کے ٹائٹل کی دوڑ کو مزید دلچسپ اور غیر متوقع بنا دیا ہے۔