انگلینڈ نے 565 کے اسکور پر اننگ ڈکلیئر کی

ناٹنگھم، 23 مئی (یواین آئی) جیک کراؤلی (124)، بین ڈکٹ (140) اور اولی پوپ (171) کی شاندار سنچریوں اور ہیری بروک (58) کی نصف سنچری اننگز کی بدولت انگلینڈ نے زمبابوے کے خلاف واحد ٹیسٹ میچ کے دوسرے دن چھ وکٹوں پر 565 رنز بنا کر اپنی اننگز ڈکلیئر کر دی۔ٹرینٹ برج اسٹیڈیم میں جمعہ کو انگلینڈ نے کل کے تین وکٹوں پر 498 رنز کے اسکور سے آگے کھیل شروع کیا۔ ٹیم کے اسکور میں صرف چار رنز کا اضافہ ہوا تھا کہ ٹنکا چیوانگا نے اولی پوپ کو آؤٹ کر کے زمبابوے کو دن کی پہلی کامیابی دلائی۔ اولی پوپ نے 166 گیندوں پر 24 چوکوں اور دو چھکوں کی مدد سے 171 رنز کی اننگز کھیلی۔ اس کے بعد بلے بازی کے لیے اترے کپتان بین اسٹوکس (9) اور اس کے بعد ہیری بروک 58 رنز بنا کر آؤٹ ہوئے۔ دونوں بلے بازوں کو مزاربانی نے آؤٹ کیا۔ ہیری بروک کے آؤٹ ہونے کے بعد انگلینڈ نے چھ وکٹوں پر 565 کے اسکور پر اپنی اننگز ڈکلیئر کر دی۔ جیمی اسمتھ چار رنز بنا کر ناٹ آؤٹ رہے۔پہلے دن زمبابوے نے ٹاس جیت کر انگلینڈ کو بلے بازی کی دعوت دی تھی۔ بلے بازی کے لیے آنے والے انگلینڈ کے لیے جیک کراؤلی اور بین ڈکٹ کی اوپننگ جوڑی نے شاندار آغاز کرتے ہوئے پہلی وکٹ کے لیے 231 رنز کی شراکت داری کی اور دونوں بلے بازوں نے اپنی اپنی سنچریاں ا سکور کیں۔ ویسلی مدھیویرے نے 42ویں اوور میں بین ڈکٹ کو آؤٹ کر کے زمبابوے کو پہلی کامیابی دلائی۔ بین ڈکٹ نے 134 گیندوں پر 20 چوکوں اور دو چھکوں کی مدد سے 140 رنز کی اننگز کھیلی۔اس کے بعد بلے بازی کے لیے آنے والے اولی پوپ نے کراؤلی کے ساتھ 137 رنز کی شراکت داری کی۔ سکندر رضا نے کراؤلی کو ایل بی ڈبلیو آؤٹ کر کے زمبابوے کے لیے دوسری وکٹ حاصل کی۔ جیک کراولی نے 171 گیندوں پر 14 چوکوں کی مدد سے 124 رنز بنائے۔ انگلینڈ کی تیسری وکٹ دن کے آخری سیشن میں جو روٹ (34) کے طور پر گری ، جنہیں مزاربانی نے آؤٹ کیا۔ پہلے دن کا کھیل ختم ہونے پر انگلینڈ نے تین وکٹوں پر 498 رنز بنا لیے تھے۔ اولی پوپ (ناٹ آؤٹ 169) اور ہیری بروک (ناٹ آؤٹ 9) کریز پر موجود تھے۔ زمبابوے کی طرف سے مزاربانی نے تین وکٹیں لیں۔ سکندر رضا اور ویسلی مدھیویرے نے ایک ایک بلے باز کو آؤٹ کیا۔