کھونٹی ، ہزاری باغ اور سمڈیگا کی ٹیموں نے اپنی طاقت دکھائی
جدید بھارت نیوز سروس
رانچی،20؍اگست: ریاستی سطح کے جواہر لال نہرو ہاکی کپ مقابلہ 2025 کا مرانگ گومکے جے پال سنگھ منڈا ہاکی اسٹیڈیم میں اختتام ہوا۔ تین روزہ مقابلہ 18 سے 20 اگست تک جاری رہا جس میں ریاست کے مختلف اضلاع سے منتخب ٹیموں نے حصہ لیا۔ یہ مقابلہ جھارکھنڈ ایجوکیشن پروجیکٹ کونسل رانچی کے زیراہتمام منعقد کیا گیا تھا۔
بچوں کو کھیلوں میں آگے بڑھنے پر توجہ دیں: وزیر کھیل
اس موقع پر وزیر کھیل سودیویہ سونو نے کہا کہ دیہی علاقوں کا ٹیلنٹ جھارکھنڈ کی اصل طاقت ہے اور حکومت ان بچوں کو قومی اور بین الاقوامی سطح تک پہنچانے کے لیے ہر ممکن مدد کرنے کی کوشش کر رہی ہے۔ جھارکھنڈ حکومت بچوں کو کھیلوں میں بھی آگے بڑھنے کے مواقع فراہم کرنے کے لیے مسلسل کام کر رہی ہے۔ تقریب کے اختتام پر فاتح اور رنر اپ ٹیموں کو ٹرافیاں، میڈلز اور سرٹیفکیٹس سے نوازا گیا۔
ہیرو ایشیا کپ ٹورنامنٹ ٹرافی کی رونمائی
اس موقع پر رانچی کے جے پال سنگھ ہاکی اسٹیڈیم سے ہیرو ایشیا کپ 2025 ٹرافی گورو یاترا کی شاندار لانچنگ کی گئی۔ جھارکھنڈ کے سیاحت اور کھیل کے وزیر سودیویہ سونو نے اس کی رسمی نقاب کشائی کرکے سفر کا آغاز کیا۔ رانچی کے ایم ایل اے سی پی سنگھ اور ہاکی انڈیا کے جنرل سکریٹری بھولناتھ سنگھ بھی موجود تھے۔کھلاڑیوں، تماشائیوں اور بچوں میں جوش و خروش دیدنی تھا۔ وزیر سدیویہ سونو نے کہا کہ اگرچہ اس بار ایشیا کپ کی میزبانی بہار کر رہا ہے۔ لیکن مستقبل میں جھارکھنڈ بھی اسے بڑے پیمانے پر منظم کرنے کے لیے تیار ہوگا۔ انہوں نے اسے ریاست کے ہاکی کلچر اور کھیلوں کی سیاحت کو فروغ دینے کا ایک قدم قرار دیا۔ اس موقع پر آنجہانی وزیر تعلیم رام داس سورین اور سابق وزیر اعلیٰ شیبو سورین کو بھی خراج عقیدت پیش کیا گیا۔ وزیر کھیل سودیویہ کمار نے اختتامی تقریب میں بطور مہمان خصوصی شرکت کی۔ اس کے علاوہ ایم ایل اے سی پی سنگھ، اسٹیٹ پروجیکٹ ڈائرکٹر ششی رنجن، اسپورٹس ڈائریکٹوریٹ کے ڈائرکٹر شیکھر جموار، ہاکی جنرل سکریٹری بھولناتھ سنگھ اور اولمپیئن منوہر ٹوپنو سمیت کئی معززین موجود تھے۔
