بنگلورو، 5 اپریل (یواین آئی) ہاکی جھارکھنڈ کے ساتھ سینئر خواتین قومی چیمپئن شپ جیتنے سے لے کر سینئرنیشنل کیمپ میں جگہ بنانے تک مہیما ٹیٹے کے لیے پچھلے کچھ ہفتے شاندار رہے ہیں۔21 سالہ مہیما اس وقت اپنی بڑی بہن کیپٹن سلیمہ ٹیٹے سمیت سینئر کھلاڑیوں کے ساتھ سائی، بنگلورو میں ٹریننگ کر رہی ہیں۔ ٹریننگ کے دوران سلیمہ کے ساتھ اپنے تجربات کو مشترک کرتے ہوئے مہیما نے کہا، “میں ہمیشہ اپنی بہن کے نقشِ قدم پر چلنا چاہتی تھی اور اپنے ملک کے لیے اچھا پرفارم کرنا چاہتی تھی۔ اس لیے اب جب میں یہاں ہوں، انکے ساتھ ٹریننگ کر رہی ہوں، تو مجھے بہت اچھا لگ رہا ہے۔ جب میں کچھ غلط کرتی ہوں، تو وہ میرے پاس آتی ہیں اور میری رہنمائی کرتی ہیں ۔ دیدی میرا بہت ساتھ دیتی ہیں۔” مہیما نے یہ بھی کہا کہ کیمپ میں شامل ہونے سے پہلے ان کی بہن نے انہیں کئی اہم باتیں بتائی تھیں۔ “انہوں نے مجھے محنت کرنے اور کسی بھی چیز سے پیچھے نہ ہٹنے کے لیے کہا۔ انہوں نے مجھے میدان پر اپنا 100 فیصد دینے کے لیے کہا۔” شروع میں مہیما کو 65 رکنی کور ممکنہ کھلاڑیوں کے گروپ میں منتخب کیا گیا تھا، لیکن ٹریننگ اور ٹیسٹ میں ان کے متاثر کن کام نے انہیں 2 اپریل کو اعلان کردہ 40 رکنی فہرست میں جگہ دلائی۔ جب ان سے اب تک سینئر کھلاڑیوں کے ساتھ ٹریننگ کے بارے میں سوال کیا گیا، تو انہوں نے جواب دیا، “یہ میرے استعمال کیے جانے والے کمبینیشن سے مختلف ہے۔ سینئر کھلاڑیوں کے ساتھ پریکٹس کرنا اچھا ہے اور میں بہت خوش ہوں کہ میں ابھی سینئر ٹیم میں ہوں، لیکن مجھے اس سطح تک پہنچنے کے لیے بہت محنت کرنی ہوگی اور بہتری لانی ہوگی، جس کی مجھے ضرورت ہے۔ “انہوں نے کہا، “بین الاقوامی کھلاڑیوں کے ساتھ مقابلہ کرنے کے لیے، ہمیں واقعی فٹ اور تیز ہونا چاہیے، اس لیے ہم سینئر کیمپ میں بہت سخت ٹریننگ کرتے ہیں۔
” مہیما 15ویں سینئر خواتین قومی چیمپئن شپ کے دوران ایک متاثر کن ٹائٹل جیتنے والی مہم کے بعد سینئر کیمپ میں شامل ہوئی تھیں۔ مڈفیلڈر نے ہاکی جھارکھنڈ کے لیے تمام پانچ میچ کھیلے اور ٹورنامنٹ میں اپنی ٹیم کے لیے اہم کردار ادا کیا۔ انہوں نے کہا، “ٹورنامنٹ کی شروعات میں، ہمیں نہیں لگا کہ ہم فائنل میں پہنچیں گے۔ لیکن جیسے جیسے ہم آگے بڑھے، ہمیں لگا کہ ہم ہار نہیں سکتے۔ ہم سونے کا تمغہ چاہتے تھے کیونکہ ہم نے کبھی تمغہ نہیں جیتا تھا، اس لیے ہم واقعی مضبوط تھے اور ہم نے ایک ٹیم کے طور پر اس کے لیے واقعی محنت کی۔” ہاکی جھارکھنڈ نے گزشتہ چیمپئن ہاکی ہریانہ کو شوٹ آؤٹ میں 4-3 سے شکست دے کر اہم ٹرافی اپنے نام کی تھی۔ مہیما نے انکشاف کیا کہ فائنل کے دن وہ بیمار تھیں۔ انہوں نے کہا، “میں بیمار تھی، اس لیے میں نے فائنل شوٹ آؤٹ میں بھی حصہ نہیں لیا۔میں نے پہلے چار بوتل پانی پیا اور میں نے پورا کھیل کھیلنے کے لیے خود کو تیار کیا تھا۔ میں اپنی ٹیم کو سونے کا تمغہ جیتانے میں مدد کرنا چاہتی تھی، اس لیے میں نے خود پر بہت زور دیا اور فائنل میں اپنا بہترین دیا۔ بیماری کی وجہ سے مجھے کبھی بھی ایسا محسوس نہیں ہوا کہ میں فائنل میچ نہیں کھیل سکتی۔” آگے کی منصوبہ بندی کے بارے میں بات کرتے ہوئے مہیما نے کہا، “مجھے دوسرے سینئرکھلاڑیوں کے سطح پر کھیلنے کے لیے واقعی محنت کرنے کی ضرورت ہے۔ میرا مقصد اتنی بہترین کارکردگی کا مظاہرہ کرنا ہے کہ میں ابتدائی لائن اپ میں جگہ بنا سکوں۔
دیدی میرا بہت ساتھ دیتی ہیں: مہیما ٹےٹے
