نئی دہلی، 28 اپریل (یو این آئی) دہلی کیپٹلس (ڈی سی) منگل کو یہاں ارون جیٹلی اسٹیڈیم میں انڈین پریمیئر لیگ (آئی پی ایل) 2025 کے 48 ویں میچ میں کولکاتہ نائٹ رائیڈرز (کے کے آر) کی میزبانی کرتے ہوئے زوردار واپسی کرنے کی کوشش کرے گی۔اکشر پٹیل کی قیادت میں دہلی کیپٹلس نے اب تک کامیابی اورکھیل کا لطف اٹھایا ہے۔ ڈی سی نے نو میں سے چھ میچ جیت کر ٹاپ فور میں اپنی جگہ برقرار رکھی ہے۔ اس کے برعکس، دفاعی چیمپئن کے کے آر نے مستقل مزاجی حاصل کرنے کے لیے جدوجہد کی ہے۔ کے کے آر نے نو میں سے صرف تین میچ جیتے ہیں اور پوائنٹس ٹیبل میں ساتویں نمبر پر ہے۔گزشتہ میچ میں رائل چیلنجرز بنگلور سے چھ وکٹ سے ہارنے کے باوجود ڈی سی کو اس بار آئی پی ایل میں ایک مضبوط ٹیم کے طور پر دیکھا جا رہا ہے۔ کے ایل راہل نے خاص طور پر ٹی20 فارمیٹ میں اپنی فارم دوبارہ حاصل کر لی ہے۔ راہل نے اب تک 52 کی اوسط سے 369 رنز بنائے ہیں جس میں تین نصف سنچریاں شامل ہیں۔ دھماکہ خیز بلے باز ابھیشیک پورل اور تجربہ کار فاف ڈو پلیسس کے ساتھ ٹاپ پر ان کی شراکت اہم ہو گی، جو الیون میں واپس آ رہے ہیں۔ دہلی کے بولنگ اٹیک کی قیادت تجربہ کار مچل اسٹارک اور چائنا مین کلدیپ یادو کریں گے۔ جہاں اسٹارک کے نام 11 وکٹیں ہیں، وہیں کلدیپ نے صرف 55.6کی اکانومی ریٹ سے متاثر کیا ہے اور درمیانی اوورز میں اہم ثابت ہوئے ہیں۔اس کے برعکس، کے کے آر اس بار جدوجہد کر رہی ہے۔ پنجاب کنگز کے خلاف ان کا پچھلا میچ ان کی اننگ کے مختصر آغاز کے بعد بارش کی وجہ سے ضائع ہو گیا تھا، جس سے انہیں واحد پوائنٹ حاصل ہوا تھا۔ رہانے، جو ٹیم کی کپتانی کر رہے ہیں، 271 رنز کے ساتھ ان کے سب سے زیادہ رنز بنانے والے کھلاڑی ہیں لیکن رنکو سنگھ اور آندرے رسل پر مشتمل مڈل آرڈر مسلسل کارکردگی دکھانے میں ناکام رہا ہے۔کولکاتہ کیمپ میں ان کی بولنگ یونٹ کو لے کر بھی خدشات ہیں۔ ورون چکرورتی، ہرشیت رانا اور ویبھو اروڑہ نے 11-11 وکٹیں حاصل کیں لیکن اہم لمحات میں اٹیک کی کمی نظر آئی۔ آل راؤنڈر سنیل نارائن ان چند کھلاڑیوں میں سے ایک ہیں جنہوں نے بلے اور گیند دونوں سے اپنا حصہ ڈالا ہے۔ آمنے سامنے مقابلوں میں، کے کے آر کو ڈی سی پر تھوڑی برتری حاصل ہے، جس نے اپنے 34 مقابلوں میں سے 18 جیتے ہیں۔ تاہم، دہلی کی موجودہ فارم اور گھر پر کھیلنے کے فائدہ کے ساتھ، میزبان ٹیم اس فرق کو کم کرنے کے لیے پراعتماد ہوگی۔ کل موسم صاف رہنے کی توقع ہے۔ارون جیٹلی اسٹیڈیم کی پچ روایتی طور پر بلے بازی کے لئے موزوں رہی ہے، حالانکہ ہدف کا تعاقب کرنے والی ٹیموں نے عام طور پر بہتر کارکردگی دکھاتی ہیں۔ نتیجے کے طور پر، ٹاس ایک اہم کردار ادا کر سکتا ہے، جس میں دونوں کپتان پہلے گیندبازی کرنے کا انتخاب کرسکتے ہیں۔
پلے آف کی اپنی خواہشات کو رفتار دینے کے ساتھ، دہلی کیپٹلس کو کولکاتہ نائٹ رائڈرس کو ہراکر ٹیبل کے ٹاپ ہاف میں اپنی جگہ مضبوط کرنے کی امید ہے۔
ڈی سی کا ہدف کے کے آرکے خلاف مضبوط واپسی کرنا ہے
