2025 میں 260 ملین ڈالر کما کر دنیا کے امیر ترین کھلاڑی بن گئے
ریاض/میامی،16 جنوری یو این آئی ) عالمی شہرت یافتہ فٹبال اسٹار کرسٹیانو رونالڈو نے ایک بار پھر مالیاتی میدان میں اپنے تمام حریفوں کو پیچھے چھوڑ دیا۔ اسپورٹیکو (Sportico) کی جانب سے جاری کردہ سال 2025 کی تازہ ترین رپورٹ کے مطابق، پرتگالی سپر اسٹار دنیا کے سب سے زیادہ کمائی کرنے والے ایتھلیٹس کی فہرست میں پہلی پوزیشن پر براجمان ہو گئے ہیں۔رونالڈو نے سال 2025 کے دوران مجموعی طور پر 260 ملین ڈالر (تقریباً 194 ملین پاؤنڈ) کمائے۔ان کی آمدن کا بڑا حصہ سعودی کلب النصر کے ساتھ سالانہ 200 ملین ڈالر کے بھاری بھرکم معاہدے سے حاصل ہوا۔میدان سے باہر، اشتہارات اور مختلف برانڈز کے ساتھ کاروباری شراکت داری سے انہوں نے مزید 60 ملین ڈالر سمیٹے۔یہ مسلسل تیسرا سال ہے جب رونالڈو کی سالانہ آمدن 200 ملین ڈالر سے تجاوز کر گئی ہے، اور وہ گزشتہ 9 سالوں سے ہر سال کم از کم 100 ملین ڈالر کما رہے ہیں۔رونالڈو کے دیرینہ حریف لیونل میسی اس فہرست میں تیسرے نمبر پر رہے۔ میسی کی 2025 کی کل آمدن 130 ملین ڈالر رہی، جو کہ رونالڈو کی کمائی کا نصف ہے۔ ارجنٹائنی اسٹار نے حال ہی میں اپنی ٹیم انٹر میامی کے ساتھ 2028 تک کے نئے معاہدے پر دستخط کیے ہیں، جبکہ ان کی ٹیم حالیہ ایم ایل ایس کپ کی فاتح بھی رہی ہے۔40 سالہ رونالڈو نے جہاں النصر کے ساتھ اپنے معاہدے میں موسمِ گرما 2027 تک توسیع کر دی ہے، وہیں انہوں نے اپنے بین الاقوامی کیریئر کے حوالے سے بھی بڑا اعلان کیا ہے۔ رونالڈو کا کہنا ہے کہ”2026 کا فٹبال ورلڈ کپ میرا آخری میگا ایونٹ ہوگا اور میں آئندہ ایک سے دو سال کے اندر فٹبال سے ریٹائرمنٹ لے لوں گا۔”پرتگالی کپتان اب تک کلب اور بین الاقوامی سطح پر 950 سے زائد گول اسکور کر چکے ہیں اور وہ 1,000 گولز کا سنگ میل عبور کرنے کے لیے پرعزم ہیں۔
