بریسبین، 06 دسمبر (یو این آئی) آسٹریلیا کی ٹیم ایشیز سیریز کے دوسرے ٹیسٹ میں انگلینڈ پر فتح حاصل کرنے اور 2۔0 کی برتری بنانے کے قریب پہنچ گئی ہے۔ انگلینڈ نے تیسرے دن اسٹمپ تک اپنے چھ وکٹیں 134 رنز پر گنوا دی ہیں اور وہ میزبان ٹیم کی پہلی اننگز کی برتری سے 43 رنز پیچھے ہیں۔ گابا میں کھیلے جارہے میچ میں انگلینڈ نے اپنی دوسری اننگز میں 6 وکٹوں کے نقصان پر 134 رنز بنالیے ہیں اور اسے اننگز کی شکست سے بچنے کے لیے مزید 43 رنز درکار ہیں۔زیک کرولی 44، اولی پوپ 26، بین ڈکٹ، جو روٹ اور ہیری بروک 15، 15 جبکہ جیمی اسمتھ 4 رنز بناکر آؤٹ ہوئے۔کپتان بین اسٹوکس اور ول جیکس 4،4 رنز بناکر کریز پر موجود ہیں۔اس سے قبل آسٹریلیا نے اپنی پہلی اننگز میں 511 رنز بناکر انگلینڈ پر 177 رنز کی برتری حاصل کی تھی۔آسٹریلیا نے کھیل کے تیسرے روز 378 رنز 6 کھلاڑی آؤٹ پر اننگز کا آغاز کیا تو مجموعی اسکور میں 5 رنز کے اضافے کے بعد ہی مائیکل نیسر (16) پویلین لوٹ گئے تھے۔ایلکس کیری 63 رنز بناکر آؤٹ ہوئے۔ مچل اسٹارک نے کیریئر بیسٹ 77 رنز کی اننگز کھیلی اور برینڈن ڈوگٹ 13 رنز بناسکے تھے۔ اسکاٹ بولیںڈ 21 رنز بناکر ناٹ آؤٹ رہے تھے۔جیک ویدرالڈ 72، مارنس لبوشین 65، کپتان اسٹیو اسمتھ 61، کیمرون گرین 45، ٹریوس ہیڈ 33 اور جوش انگلس 23 رنز بناکر آؤٹ ہوئے تھے۔انگلینڈ کی جانب سے برائیڈن کارس نے 4، کپتان بین اسٹوکس نے 3 جبکہ جوفرا آرچر، گس ایٹکنسن اور ول جیکس نے ایک ایک وکٹ حاصل کی۔یاد رہے کہ انگلش ٹیم اپنی پہلی اننگز میں 334 رنز پر آل آؤٹ ہوگئی تھی۔
جو روٹ 138 رنز بناکر ناقابل شکست رہے تھے۔آسٹریلیا کی جانب سے مچل اسٹارک نے 6 جبکہ مائیکل نیسر، برینڈن ڈوگٹ اور اسکاٹ بولینڈ نے ایک ایک وکٹ حاصل کی تھی۔
ایشیز : آسٹریلیا انگلینڈ پر جیت اور 0-2سے سبقت حاصل کرنے کے قریب
